Elimizde balalarǵa papılloma vırýsyna qarsy vaktsına salyna bastaıdy

ASTANA. QazAqparat – QR Densaýlyq saqtaý mınıstrligi halyqqa onkologııalyq kómek kórsetý boıynsha 2023-2025 jyldarǵa arnalǵan keshendi jospar ázirlep jatyr. Bul týraly atalǵan vedomstvonyń basshysy Ajar Ǵınııat aıtty, dep habarlaıdy QazAqparat tilshisi.

«Qazirgi kezde mınıstrlik halyqqa onkologııalyq kómek kórsetýdi jaqsartýdyń 2023-2025 jyldarǵa arnalǵan keshendi josparyn ázirlep jatyr. Bul josparda adam papılloma vırýsyna qarsy vaktsına egý qarastyrylǵan. Sonymen qatar, atalǵan is-sharalar aıasynda qaterli isik aýrýlaryna qarsy tıisti qadamdar eskerilgen. Atap aıtqanda, bul baǵytta tıisti jumys atqarylady jáne ony ata-analardyń kelisimin eskere otyryp iske asyramyz», - dedi A. Ǵınııat Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, bıyl atalǵan josparǵa qatysty daıyndyq júrgiziledi.

«2023 jyly egjeı-tegjeıli talqylaý, normatıvtik-quqyqtyq aktilerdi daıarlaý, bıýdjetti qorǵaý jumystary eskerilgen. Bıýdjet bekitilgennen keıin atalǵan is-sharalar keler jyldan bastalady. Bul turǵyda kámeletke tolmaǵan balalar qamtylady. Eger bul is-sharalar ulttyq kúntizbege engizilse, onyń barlyǵy aqysyz bolady», - dedi mınıstr.

Eske salsaq, 2013 jyldyń qyrkúıek aıynan bastap jasóspirim qyzdarǵa papılloma vırýsyna qarsy vaktsına egiletini habarlanǵan edi.

Atalǵan papılloma vırýsyna qarsy egý jumystary qaterli isiktiń aldyn alý maqsatynda júrgiziledi.