Elimizde balalarǵa qatysty qylmys sany azaıdy

NUR-SULTAN. QazAqparat – Qazaqstanda kámeletke tolmaǵandaǵa qatysty jynystyq zorlyq-zombylyq qylmysy sońǵy bes jylda 1,5 esege azaıdy, dep habarlaıdy QazAqparat QR ІІM silteme jasap.

«Kámeletke tolmaǵandarǵa qatysty qylmystardyń tómendep jatqanyn atap ótken jón. Bul kórsetkish jyl saıyn myńnan astam faktige azaıyp keledi. 2013 jyldan bastap olardyń sany 5 esege – 9 myńnan 1800 faktige (2020 j.) deıin azaıǵan», - dedi QR ІІM Ákimshilik polıtsııa komıteti tóraǵasynyń orynbasary Alekseı Mılıýk ІІM-de ótken onlaın-brıfıng barysynda.

Onyń aıtýynsha, kámeletke tolmaǵandardyń densaýlyǵyna aýyr zııan keltirý 12%-ǵa, olarǵa qatysty jasalǵan qaraqshylyq 71%-ǵa, urlyq 43,7%-ǵa, tonaý 49,6%-ǵa jáne buzaqylyq 27%-ǵa tómendegeni baıqalady.

«Sondaı-aq, ІІM kámeletke tolmaǵandarǵa qatysty jynystyq zorlyq kórsetý qylmys sany sońǵy 5 jylda 1,5 esege qysqardy», - deıdi spıker.

Buǵan deıin A. Mılıýk Qazaqstanda 5 myńnan astam bala polıtsııa esebinde turǵanyn aıtqan edi.