Elimizde balalarǵa arnalǵan «Áleýmettik patronat» jobasy iske qosylmaq

ASTANA. QazAqparat - Turmysy nashar otbasylardan shyqqan balalardy qoldaý jobasy iske qosylady. Bul jaıynda «Ashyq» NQA portalynda jarııalanǵan balalardy zorlyq-zombylyqtan qorǵaý, sýıtsıdtiń aldyn alý, olardyń quqyqtary men salamattyǵyn qamtamasyz etý jónindegi 2023 – 2025 jyldarǵa arnalǵan keshendi josparda jazylǵan, dep habarlaıdy QazAqparat tilshisi.

«Áleýmettik patronat» jobasy turmysy nashar otbasylardan shyqqan balalardy áleýmettik qyzmettermen jan-jaqty súıemeldeýge múmkindik beredi. Bul qyzmet ómirlik qıyn jaǵdaıǵa nemese áleýmettik problemalarǵa tap bolǵan otbasylarǵa qoldaý kórsetýge jáne olarǵa járdemdesýge baǵyttalǵan bastama», - delingen qujatta.

Negizgi maqsat - olardyń ómiriniń ártúrli aspektilerine qoldaý kórsetý jáne kómektesý arqyly az qamtylǵan otbasylardyń ál-aýqaty men ómir súrý sapasyn arttyrý. Áleýmettik patronat otbasylyq qatynastardyń buzylýy, ata-ana tárbıesi máseleleri, otbasyndaǵy zorlyq-zombylyq nemese basqa da qıyndyqtar boıynsha túrli jaǵdaıǵa tap bolǵan otbasylarǵa baǵyttalǵan joba.

Bul jobada aıasynda áleýmettik qyzmet salasyndaǵy tájirıbeli mamandar qamtylady. Olar jeke qoldaý, keńes berý, janjaldardy sheshýge kómektesý sııaqty jumystarǵa tartylyp, áleýmettik qyzmetter men resýrstardy alýǵa qoldaý jasaıdy.

Sonymen qatar, ár mektepte balanyń áleýmettik ál-aýqatyn qamtamasyz etýge baǵyttalǵan áleýmettik pedagogtyń mindetti laýazymyn engizý usynylyp otyr.