Elimizde balalardy zorlyq-zombylyqtan qorǵaýdyń keshendi jospary qabyldanbaq

ASTANA. QazAqparat – Elimizde «Balalardy zorlyq-zombylyqtan qorǵaý, sýıtsıdtiń aldyn alý, olardyń quqyǵy men ál-aýqatyn qamtamasyz etý jónindegi 2023 – 2025 jyldarǵa arnalǵan «Bala qorǵaý» keshendi jospary bekitilmek, dep habarlaıdy QazAqparat tilshisi.

Úkimettiń qaýly jobasy ashyq normatıvtik-quqyqtyq aktiler portalynda jarııalandy.

Qujatta jobany qabyldaýǵa tıisti quqyqtyq aktiler, Qazaqstan Respýblıkasy ratıfıkatsııalaǵan halyqaralyq sharttardyń normalary, Qazaqstan Respýblıkasy qatysýshysy bolyp tabylatyn halyqaralyq uıymdardyń sheshimderi, Prezıdenttiń, Prezıdent Ákimshiligi, Úkimet jáne Keńse basshylyǵynyń hattamalyq jáne ózge de tapsyrmalary negizdeme sanalatyndyǵy atalyp ótilgen.

«Jobany iske asyrý respýblıkalyq jáne jergilikti bıýdjetterdiń kiristerin qysqartýdy nemese shyǵystaryn ulǵaıtýdy kózdemeıdi. Osy jobany qabyldaý teris áleýmettik-ekonomıkalyq jáne/nemese quqyqtyq saldarlarǵa ákep soqpaıdy», - delingen Úkimettiń túsindirme jazbasynda.

Atalǵan qaýly jobasynyń maqsaty – balalardyń qaýipsizdigin qamtamasyz etý, balalarǵa ýaqtyly bilikti kómek kórsetý, sondaı-aq 2023-2025 jyldarǵa arnalǵan balalarǵa qatysty zorlyq-zombylyqtyń aldyn alýǵa baǵyttalǵan qosymsha sharalar keshenin qabyldaý jónindegi júıeni qurý.