Elimizde balalardy erte jastan damytý mamandary joqtyń qasy - Bilim mınıstri
ASTANA. 9 jeltoqsan. QazAqparat - Búgingi kúni respýblıkamyzda mektepke deıingi uıymdarǵa ornalasýǵa 458 myń ótinish tirkelgen. Onyń ishinde alty jasqa deıingi balalar sany eki júz myńdy quraıdy. Búgin Májilistegi Úkimet saǵatynda baıandama jasaǵan Bilim jáne ǵylym mınıstri Aslan Sárinjipov osylaı málim etti.
«Balalardy erte jastan damytýdyń mamandary joqtyń qasy. Mektepke deıingi oqytýǵa mamandanǵan joǵary bilimi bar pedagogtarynyń úlesi 20 paıyzdan sál ǵana asady. Biz keler jyly balalardy erte oqytý jóninde ereje ázirleýdi josparlap otyrmyz. Jańa júıe arqyly toǵyz myń pedagog úsh jasqa deıingi balalarmen jumys isteý boıynsha biliktilikti arttyrý kýrsynan ótedi. Sóıtip, balalardy erte damytý boıynsha pedagogtar úlesi keminde otyz paıyzǵa jetkizemiz», - deıdi A. Sárinjipov.
Toqtala ketetin jaıt, mınıstrliktiń taratqan málimetine qaraǵanda, elimizde «Balapan» baǵdarlamasy aıasynda 3-6 jas aralyǵyndaǵy balalardy qamtý boıynsha jospar aldyn ala oryndalyp 71,5 paıyzǵa jetken. Mektepke deıingi uıymdardyń sany sońǵy 3 jyl ishinde 2 esege artyp, onyń ishinde jekemenshik balabaqshalar sany 1,7 esege ósti. Alaıda soǵan qaramastan 2013 jyldyń alǵashqy jartyjyldyǵynda balabaqshada kezek kútkender sany 51,9 myńǵa nemese 12,7 paıyzǵa kóbeıgen.
