Elimizde balalar arasyndaǵy semizdik máselesi ózekti bolyp otyr – senator
Bul jaıly ol búgin ótip jatqan «Qazaqstandaǵy balalar semizdiginiń taralýyn zertteý» konferentsııasynda málimdedi. Atalǵan sharanyń maqsaty – balalar semizdiginiń jáne tamaqtanýynyń zertteý nátıjelerin usyný, mektep jasyndaǵy balalar arasynda artyq dene salmaǵy jáne az qımyldy ómir saltynyń taralýy máselesine qoǵamnyń nazaryn aýdarý.
«2022 jyldy Memleket basshysy Qasym-Jomart Toqaev «Balalar jyly» dep jarııalady. Sondyqtan bıyl biz óz tarapymyzdan balalarymyzdyń densaýlyǵyn nyǵaıtýǵa, ómir súrý sapasyn arttyrýǵa tıisti sharalardy qabyldaýymyz kerek. Elimizde balalar arasyndaǵy semizdik máselesi ózekti. Jalpy kúlli álemde balalardyń semizdikke shaldyǵýy beleń alyp barady. Damyǵan elderde osy teris tendentsııaǵa tosqaýyl qoıý úshin keshendi josparlar júzege asyrylýda. Bizde de qajetti sharalar qolǵa alynýy qajet», - dedi senator.
Onyń aıtýynsha, balalardyń túrli syrqattarǵa shaldyǵýy, onyń ishinde artyq salmaqqa dýshar bolýy el ekonomıkasyna áser etetindigi sózsiz.
«Halyqaralyq zertteý nátıjeleri kórsetkendeı, semizdiktiń saldarynan 2050 jyly týǵan balalar qazirgilerge qaraǵanda az ómir súretin bolady. Semizdik – halyq óliminiń negizgi eki sebepteriniń birine aınalmaq. Sol úshin balalardy qarshadaıynan durys tamaqtandyrý – medıtsına, bilim salalaryndaǵy basty mindet bolýy tıis», - dedi Aqmaral Álnazarova.
