Elimizde balalar arasynda tis aýrýy asqynyp tur - dáriger

ALMATY. QazAqparat - Elimizde balalar arasynda tis aýrýy asqynyp tur. Bul týraly ál-Farabı atyndaǵy qazaq ulttyq ýnıversıtetiniń medıtsına jáne densaýlyq saqtaý fakýlteti joǵary medıtsına mektebiniń klınıkalyq mamandyqtar kafedrasynyń professory Klara Shalabaeva aıtty, dep habarlaıdy QazAqparat tilshisi.

Klara Shalabaevanyń aıtýynsha, balalarda tis aýrýlary jıi kezdesedi.

«Dúnıejúzilik densaýlyq saqtaý uıymynyń krıterııleri boıynsha bizdiń respýblıkada ártúrli jas toptaryndaǵy balalarda karıestiń taralýy ortasha eseppen 70-85 paıyzdy quraıdy, al qarqyndylyǵy jaǵynan bizdiń balalarda karıestiń dekompensatsııalanǵan túri jıi kezdesedi», - dedi Klara Shalabaeva.

Maman tis aýrýynyń túrli sebebi bar ekenin aıtty. Onyń biri tátti taǵamdardy kóp tutynýdan bolsa, bala aǵzasyna kaltsıı jetispeýshiliginen de tis qurttaıdy.

«Tis aýrýlarynyń alǵashqy profılaktıkasy baǵdarlamasynyń joqtyǵy, mektep jasyndaǵy balalarǵa josparly túrde aýyz qýysyn saýyqtyrý, jalpy bilim beretin mektepterdegi statsıonarlyq stomatologııalyq kabınetterdiń jabylýy sııaqty mańyzdy áleýmettik faktorlar tis saýlyǵynyń nasharlaýyna ákelip soqtyrdy», - deıdi Klara Shalabaeva.

Sonymen qatar ol respýblıkadaǵy stomatologııalyq mekemelerdiń 80%-dan astamynyń jeke menshikke ótýi stomatologııalyq kómekti balalar men jasóspirimderge qoljetimsiz etkenin tilge tıek etti.

«Stomatologııalyq qyzmetterdiń (plombalardyń) joǵary baǵasy materıaldyq jaǵdaıy tómen, aýyldy jerlerde turatyn kópbalaly otbasy balalarynyń aýyz qýysyn jaqsartý múmkindiginen aıyrdy. Al tis aýrýyn azaıtpaı, deni saý bala ósirý múmkin emes», - dedi spıker