Elimizde bala týý kórsetkishi 3 paıyzǵa ósti

NUR-SULTAN. QazAqparat – 2020 jyldyń qorytyndysy boıynsha náreste óliminiń kórsetkishi 3 paıyzǵa tómendedi. Bul týraly halyq aldynda esep berý kezdesýinde QR Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Jalpy, memleket pen medıtsına qyzmetkerleriniń kúsh-jigeriniń arqasynda respýblıkadaǵy medıtsınalyq-demografııalyq ahýal bylaısha sıpattalady. Ómir súrý uzaqtyǵynyń ósýi baıqaldy. 2020 jyldyń qorytyndysy boıynsha náreste óliminiń kórsetkishi 3%-ǵa tómendedi. Bala týý kórsetkishi 3%-ǵa óskeni baıqaldy», - dedi mınıstr Ortalyq kommýnıkatsııalar qyzmetinde.

Onyń aıtýynsha, qaterli aýrýlardan bolatyn ólim kórsetkishi 3 paıyzǵa tómendedi. Birlesken vedomstvoaralyq jumystyń arqasynda jaraqattardan, jazataıym oqıǵalardan jáne ýlanýdan bolatyn ólim-jitim kórsetkishi 15 paıyzǵa azaıdy. Týberkýlez sııaqty qaýipti aýrýdan bolatyn ólim 21 paıyzǵa tómendedi.

«Bul qurǵaq sandardyń artynda adam ómiri, medıtsına qyzmetkerleriniń qajyrly eńbegi, sondaı-aq ishki ister qyzmetteriniń, jergilikti atqarýshy jáne ortalyq memlekettik organdardyń qyzmeti turǵanyn atap ótken jón. Tipti ólimniń kem degende 1%-ǵa tómendeýi de úlken jetistik bolyp sanalady, óıtkeni el aýqymynda bul paıyzdyń artynda myńdaǵan adamnyń ómiri jatyr», - dedi A. Tsoı.