Elimizde bala asyrap alýshylardyń qatary arta túsken
ASTANA. Qańtardyń 19-y. QazAqparat - Búgin Májilistiń Halyqaralyq ister, qorǵanys jáne qaýipsizdik komıtetiniń otyrysy ótti.
Onda «Qazaqstan Respýblıkasynyń Balalardy qorǵaý jáne balany sheteldik asyrap alýǵa qatysty yntymaqtastyq týraly konventsııaǵa qosylýy jáne ony ratıfıkatsııalaýy týraly» zań jobasy qaraldy, dep habarlaıdy QazAqparat.
«Búginde elimizde bala asyrap alýshylar sany kóbeıip keledi. 2009 jyly 3 myń 44 bala asyraýǵa alyndy. Ol burynǵy jylǵydan 271 balaǵa kóp. Endi syrtta júrgen balalardyń quqyǵyn qorǵap, ómirin saqtaımyz»,-dedi zań jobasy boıynsha baıandama jasaǵan Bilim jáne ǵylym mınıstriniń orynbasary Mahmetǵalı Sarybekov.
Álemniń 72 eli qol qoıǵan konventsııa - Gaaga konventsııasyna qosylý úshin 2006 jyly atalǵan zań jobasy ázirlenip, Parlamentke kelip tústi. Búginge deıin sheteldikter Qazaqstannan asyrap alǵan balalardyń kóbisi Amerıka Qurama Shtattaryna ketken. Olar jyl saıyn balanyń jaı-kúıin aıtyp esep berip otyrady, degenimen de barlyǵyn birdeı qadaǵalap otyrý múmkin emes. «Bala 18 jasqa tolǵanynsha eki memlekettiń de esebinde turyp, azamaty atanady. Odan ári qaraı azamattyǵyn ózi tańdaıdy»,- dep kórsetiledi zań jobasynda.
Komıtet otyrysynda depýtattar Sát Toqpaqbaev, Saǵynbek Tursynov, Saýyrbaı Esjanov, Ýálıhan Qalıjanov, Ýálıhan Qońyrbaevtar zań jobasyn qyzý talqyǵa saldy. Atalǵan zań jobasy boıynsha jumys tobynyń jetekshisi Baǵıla Baımaǵanbetova qosymsha sóz sóıledi.
