Elimizde azyq-túlik taýarlarynyń baǵasy eń arzan qala - Taldyqorǵan
ASTANA. 3 qarasha. QazAqparat /Rýslan Ǵabbasov/ - Áleýmettik mańyzy bar taýarlardyń baǵasyn turaqty ustaý baǵytynda tıisti sharalar atqarylýda. Bul týraly búgin Astanada Ekonomıkalyq damý jáne saýda mınıstrligi Saýda komıtetiniń saýda ınfraqurylymyn damytý basqarmasynyń bastyǵy Danııar Ahmetov aıtty.
«QazAgroMarketıng» AQ-nyń málimeti aıasynda 26 qazandaǵy jaǵdaı boıynsha ıaǵnı, 26 qyrkúıektegi ahýalmen salystyrǵanda barlyq áleýmettik mańyzy bar taýarlarǵa baǵa ósip otyr»,-dedi ol.
Atap aıtqanda, 26 qazandaǵy jaǵdaı boıynsha respýblıkadaǵy eń qymbat qala Astana, al eń arzan qala Taldyqorǵan bolyp otyr.
«6-8 paıyz josparlanǵan ınflıatsııa dálizinde bolý úshin azyq-túlik taýarlary boıynsha ınflıatsııa 9,4 paıyzdan aspaýy tıis»,-dedi D. Ahmetov. Osy oraıda ol 6-8 paıyzdyq ınflıatsııa dálizinen aspaý úshin barlyq múmkindikter bar ekenin, sondaı-aq azyq-túlik taýarlarynyń baǵasyn turaqtandyrý baǵytynda Úkimet tarapynan tıisti sharalar atqarylyp jatqanyn aıtyp ótti.
D. Ahmetovtyń sózine qaraǵanda, jaqynda azyq-túlik taýarlarynyń baǵasyn turaqty ustaý maqsatynda Qyrǵyzstanmen saýda-ekonomıkalyq yntymaqtastyqty damytý aıasynda mınıstrlik Jambyl oblysynyń Qordaı aýylynda Qazaqstan-Qyrǵyzstan agrobıznes-forýmy ótkizildi. Atalǵan forýmǵa qyrǵyzstandyq taraptan jemis jáne kókónis jetkizýde áleýeti joǵary kompanııalardyń ókilderi men eki eldiń tıisti memlekettik organdary qatysty. Osynyń nátıjesinde yntymaqtastyq týraly 21 hattamaǵa qol qoıylǵan. Aıta keteıik, bekitilgen hattamalar 120 myń tonnadan astam ónimdi quraıtyn 600 myń AQSh dollarynan astam qarjyǵa baǵalandy. Sonymen qatar «Jambyl oblysynyń saýda bırjasy» AQ men «Qyrǵyzresýrsy» memlekettik kásiporny arasynda Qazaqstanǵa 500 myń tonna kóleminde (23 mlrd. 700 mln teńgege) kartop jetkizý turǵysynda ýaǵdalastyq jasalǵan.
