Elimizde ajyrasqandar sany artyp otyr - A. Samaqova
ASTANA. Mamyrdyń 25-i. QazAqparat /Qanat Mámetqazyuly/ - Búgin «Demografııalyq ózgerister turǵysyndaǵy otbasy saıasatynyń negizgi tujyrymdary men halyqaralyq úrdister» atty taqyrypta ótken dóńgelek ústel barysynda Májilis depýtaty Aıtkúl Samaqova elimizdegi otbasy jáne demografııa máselesine alańdaýshylyq bildirdi,
dep habarlaıdy QazAqparat.
Depýtattyń aıtýynsha, sońǵy jyldardaǵy kórsetkishter boıynsha elimizde ajyrasqan otbasylar sany artyp otyr. Máselen, statıstıka derekterine sáıkes, Qazaqstandaǵy árbir tórtinshi nekeniń ǵumyry uzaqqa sozylmaıdy eken. Budan bólek, sońǵy jyldary bala tárbıesine ákelerdiń aralasýy tómendegen, jarty mıllıonǵa jýyq bala jalǵyzbasty áıelderdiń tárbıesinde turǵan kórinedi. Resmı nekede turmaǵan tulǵalardyń sany da artyp, dúnıege kelgen árbir besinshi bala nekesiz týady eken.
«Búgingi kúni Qazaqstanda kóp balaly otbasyǵa qaraǵanda bala sany az otbasylardyń úlesi basym bolyp otyr. Máselen, búkil eldegi otbasylardyń tek 6 paıyzynda ǵana balalar sany 4-eý jáne odan joǵary. Degenmen, kóp balaly sanatqa jatatyn bundaı otbasylardyń negizgi bóligin oralmandar quraıdy», dedi A. Samaqova.
Sonymen birge, depýtat eldegi áleýmettik jetimdik máselesine de nazar aýdartty. «Áleýmettik jetimdik, ıaǵnı ata-analary bar «tiri jetimder» máselesi de úlken problemaǵa aınalyp otyr. Búgingi kúni Qazaqstanda bundaı tastandy balalar sany 42,5 myńdy quraıdy», dedi ol.
