Elimizde azamattardyń quqyqtaryn qorǵaýdy kúsheıtý zańnamasy jetildirildi

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń Qylmystyq jáne Qylmystyq-protsestik kodeksterine qylmystyq protseste azamattardyń quqyqtaryn qorǵaýdy kúsheıtý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasyna QR Parlamentiniń bir top depýtaty bastamashy boldy. Onyń negizgi maqsaty - qylmystyq protseste azamattardyń quqyqtaryn qorǵaýdy kúsheıtý bóliginde qylmystyq jáne qylmystyq-protsestik zańnamany jetildirý.

Qylmystyq kodekske usynylyp otyrǵan túzetý yntymaqtastyq týraly protsestik kelisimniń barlyq sharttaryn oryndaýyna baılanysty adamdardy qylmystyq jaýaptylyqtan bosatý múmkindigine baǵyttalǵan.

Qylmystyq-protsestik kodekske túzetýler protseske qatysýshylardyń pikirlerin eskere otyryp, qylmystyq protsesti elektrondyq formatta júrgizý; tergeý sýdıasynyń qamaýda ustaýǵa sanktsııa berý, sanktsııa berýden bas tartý týraly qaýlylaryn qaıta qaraý kezinde ashyq sot otyrysyn ótkizý múmkindigine jáne basqalarǵa baǵyttalǵan.

Sonymen qatar, birinshi satydaǵy sotta, apellıatsııalyq jáne kassatsııalyq satyda sýdıaǵa qarsylyq bildirýge qatysty normalardy jetildirý usynylady.

Atalǵan túzetýlerdi iske asyrý qylmystyq protsestiń jaryspalylyǵyn jáne qylmystyq protseske qatysýshylardyń quqyqtary men zańdy múddeleriniń saqtalýyn qamtamasyz etýdiń tıimdiligin arttyrýǵa múmkindik beredi.

Zań jobasyn jumys toby aıasynda talqylaý kezinde Parlament Májilisiniń depýtattary men Zańnama bóliminiń usynystary qaraldy, quqyqtyq olqylyqtardy joıý, zań jobasynyń normalaryn bir-birine jáne Qazaqstan Respýblıkasynyń basqa da zańnamalyq aktilerine sáıkes keltirý maqsatynda zań jobasynyń búkil mátini boıynsha redaktsııalyq, naqtylaýshy sıpattaǵy túzetýler engizildi.