Elimizde áıelder ıpotekasy qalaı júzege asyp jatyr

NUR-SULTAN. QazAqparat – Qazaqstanda ótken jyldan bastap áıelderge arnalǵan ıpoteka paıda boldy. Búginde 500-den astam áıel ıpotekaǵa qoly jetti. Bul týraly «Otbasy banki» AQ basqarma tóraǵasy Lázzat Ibragımova málim etti, dep QazAqparat tilshisi.

«Áıelderge arnalǵan ıpotekanyń paıyzdyq mólsheri joǵary. ıAǵnı jyldyq mólsherlemesi 11% - dan astam bolsa, bastapqy jarna 20% -dy quraıdy. Bul tıimdi shart dep oılaımyn, sebebi baspana baǵasynyń 50%-n jınaýdyń qajeti joq. Bizge berilgen alǵashqy transh 8 mlrd teńgeni qurap otyr. Jáne búgingi tańda shamamen 570 áıelge nesıe berildi. Jalpy áıelderge arnalǵan ıpotekaǵa suranys joǵary. Taǵy bir jaıt qatysýshylar tabys mólsherin kórsetýdi alyp tastaýdy surap otyr. Osy oraıda aıtarym, bizdiń maqsat – bireýdiń tabysyn sanaý emes, klıenniń ıpotekany tóleý alý múmkindigi men qabiletin baqylaý maqsatynda jasalyp otyr», - dedi Lázzat Ibragımova Baigenews.kz aqparat agenttigi jobasynyń tikeleı efırinde.

Eske sala ketsek, Qazaqstanda áıelderge arnalǵan ıpoteka máselesi 2019 jyly kóterilgen edi.

Ondaǵy maqsat - Qazaqstanda turǵyn úı salasynda genderlik teńdikti jetildirý.

Buǵan deıin habarlaǵanymyzdaı, bıyl «Elorda jastary» turǵyn úı baǵdarlamasy aıasynda 200 astanalyq jas baspanaly bolady.