Elimizde avtokólik urlyǵy órship tur
NUR-SULTAN. QazAqparat - 2020 jyldyń 8 aıynda elimizde 1 733 avtokólik urlanyp, onyń 233-i ǵana tabylǵan. Mundaı derekti QR Premer-Mınıstriniń orynbasary Roman Sklıardyń atyna saýal joldaǵan Májilis depýtaty Ersultan Bekturǵanov keltirdi, dep habarlaıdy QazAqparat tilshisi.
«Sizdiń atyńyzǵa saýal joldaýymyz, kólik urlyǵynan jábir shekken azamattarymyzdyń ótinishteri sebep bolyp otyr. QR Іshki ister mınıstrligi usynǵan málimetine sáıkes sońǵy 2 jyl jáne 2020 jyldyń 8 aıy ishinde 5 132 kólik urlanyp, onyń ishinde tek qana 1 922 kólik ıelerine qaıtaryldy. Jalpy, kimniń bolsa da avtokóliginiń joǵalýy jáne onyń tabylmaı ketýi, jábirlengen januıa úshin aýyr tıetini belgili. Statıstıkaǵa qaraǵanda 2019 jyly 1 490 avtokólik urlanyp, onyń 671-i ǵana tabylǵan. Al osy jyldyń 8 aıynda 1 733 avtokólik urlanyp, 233 ǵana tabylyp otyr», - dedi depýtat.
Onyń atap ótýinshe, mundaı kórsetkishke sebepterdiń biri avtokólik quraldaryn ekinshi rettik esepke alý nemese sheshý kezinde avtokóliktiń shanaǵy men qozǵaltqyshynyń nómirlik belgilerin vızýaldy tekserý júrgizýdi alyp tastaý boldy. Sońǵy 2 jyl jáne 2020 jyldyń 8 aıy ishinde eki rettik sanaqqa qoıylǵan kólikterdiń sany 2 325 820 quraǵan.
Osyǵan oraı depýtat shanaqtyń jáne qozǵaltqyshtyń nómerlik belgileriniń túpnusqalyǵy bóliginde jáne kólikti ekinshi rettik qaıta tirkeý kezinde sáıkestigin tekserýdi qaıta iske asyrý múmkindigin qarastyrýdy surap otyr.
