Elimizde aýyl sharýashylyǵy ónimi 3,2% kóbeıdi

ASTANA. QazAqparat – 2023 jyldyń birinshi jarty jylynyń qorytyndysy boıynsha Qazaqstanda aýyl sharýashylyǵynyń jalpy óniminiń kólemi 3,2%-ǵa artyp, 2,1 trln teńge boldy, dep habarlaıdy QazAqparat.

Aýyl sharýashylyǵy mınıstrliginiń málimetinshe, ósim negizinen mal sharýashylyǵy ónimderin óndirý kóleminiń 3,3%-ǵa ulǵaıýy esebinen bolǵan. Qazaqstanda et 4,5%-ǵa artyq (tiri salmaqta 1 mln tonna) jáne sút 2,9%-ǵa artyq (3,2 mln tonna) óndirile bastady.

Jyl basynan beri elimizde mal basy men qus sanynyń ósýi baıqalady. Máselen, ІQM sany 3,7%-ǵa artyp, 10,3 mln basty, qoı men eshki 3,4%-ǵa kóbeıip, 27,4 mln basqa, jylqy basy 8,4%-ǵa ósip, 4,4 mln basqa jetse, qus sany 1,2% - ǵa artyp, 49,9 mln basqa deıin artty.

79,3 mlrd teńgege ósimdik sharýashylyǵynyń ónimi óndirildi. Atalǵan kezeńde eldegi azyq-túlik óndirisi aqshalaı balamada 5,3%-ǵa kóbeıdi nemese 1,5 trln teńge boldy.

Sonymen qatar kókónis konservilerin shyǵarý kólemi 21,1%-ǵa (8,1 myń tonnadan 9,8 myń tonnaǵa deıin), sary maı 18,2%-ǵa (12,4 myń tonnadan 14,6 myń tonnaǵa deıin), ósimdik maıy 7,6%-ǵa (315,9 myń tonnadan 339,7 myń tonnaǵa deıin), qant 5,7%-ǵa (148,9 myń tonnadan 157,5 myń tonnaǵa deıin), shujyq ónimderi 4,9%-ǵa (30,6 myń tonnadan 32,1 myń tonnaǵa deıin), óńdelgen sút 3,3%-ǵa (287 myń tonnadan 296,6 myń tonnaǵa deıin), un 0,4%-ǵa (1 604,1 myń tonnadan 1 610,3 myń tonnaǵa deıin) ósti.

Aýyl sharýashylyǵy men azyq-túlik óndirisiniń negizgi kapıtalyna ınvestıtsııa aǵynynyń turaqty úrdisi saqtalyp otyr.

Aýyl sharýashylyǵyna salynǵan kapıtal kólemi 22,1%-ǵa artyp, 432,8 mlrd teńge boldy. Tamaq ónimderin óndirýge quıylǵan qarjy 13,4%-ǵa artyp, 62,5 mlrd teńgege jetti.

5 aıda AÓK óniminiń eksporty 2,3 mlrd dollarǵa jetti. Bul ótken jyldyń sáıkes kezeńimen salystyrǵanda 5,6%-ǵa artyq. Sondaı-aq eksporttyń jalpy kólemindegi óńdelgen ónimniń úlesi 40% boldy.