Elimizde aýyl sharýashylyǵy ónimderiniń eksporty artty
ASTANA. QazAqparat - Sońǵy úsh aıda elimizde aýyl sharýashylyǵy ónimderiniń eksporty 47 paıyzǵa artty. Salaǵa quıylǵan ınvestıtsııa kólemi 1,4 paıyzǵa ósip, 88 mıllıard teńgeni qurady. Mundaı málimdemeni vedomstvo basshysy Ómirzaq Shókeev turǵyndarmen eseptik kezdesýi barysynda atap ótti, dep habarlaıdy Habar24 kz saıty.
Saıta taratqan málimetterge qaraǵanda aýyl sharýashylyǵy salasynda jetistikter bar, alaıda aqsap jatqan tustary da joq emes. Máselen ótken jyly un men bıdaı eksporty aıtarlyqtaı azaıyp ketken. Bul ónimder halyqaralyq básekege tótep bere almaı otyr. Onyń ústine kórshilerimiz Qytaı, Reseı, Ózbekstan elderi agrarlyq-ónerkásiptik keshenin damytý úshin sharýalaryna barynsha jaǵdaı jasaǵan.
Ózbekstan aýyl sharýashylyǵy tehnıkasyn 2 paıyzben lızıngke beredi. Al Qazaqstanda bul 14 paıyz. Sondaı-aq kedendik tólemder men salyqtan bosatý máselesi taǵy bar. Oǵan jyl saıyn biz de dándi sebý men jınaý maýsymynda janarmaı baǵasynyń sharyqtap ketetinin qosyńyz. Osynyń bári taýardyń ózindik qunyna úlken áser etip, jergilikti sharýalarǵa qolbaılaý bolyp otyr.
«Janar-jaǵarmaıdy alyp keletin kompanııalar da jekemenshik. Bizdiń aýyl sharýashylyǵy taýaryn óndirýshiler de jekemenshik. Eki jekemenshik kompanııa bir-birine aqysyn jibergisi kelmeıdi, ol túsinikti. Olar suraqty bylaı qoıady. Biz naryq zamanynda jumys istep jatqan kompanııalarmyz «nege bizdiń esebimizden Sizder basqa jekemenshik kompanııaǵa arzandatylǵan baǵamen janarmaıdy bergilerińiz keledi» dep. Olaı bolatyn bolsa arnaıy qarjy bólip, úkimetten sol aıyrmashylyqty tóleńizder deıdi»,-deıdi QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev.
