Elimizde aýtızmge shaldyqqan balalar sany 9 myńǵa jetti
«Jyl saıyn 2 sáýirde Dúnıejúzilik aýtızm máselesi týraly aqparat taratý kúni atap ótiledi. 2003 jyly elimizde aýtızm spektri buzylǵan (ASB) 77 bala tirkelse, búgingi kúni bul kórsetkish 9 myńǵa jetti. Sondaı-aq statıstıka qazir azamattardyń aýtızm týraly kóbirek aqparat biletinin, dıagnostıka men tirkeý júrgizilip jatqanyn, odan bólek, soǵan sáıkes kómektiń uıymdastyrylyp, belgili bir ınfraqurylym jasalyp jatqany týraly kórsetetinin túsiný mańyzdy. Eger balalardaǵy buzylystardyń basqa túrleri (nashar estıtin, nashar kóretin jáne t.b.) úshin ınfraqurylym, ádistemeler, standarttar, baǵdarlamalar, mamandar men arnaıy uıymdar burynnan bolsa, aýtızmmen aýyratyn balalarmen jumys isteýde jaǵdaı basqasha ekenin atap ótken jón», - dep jazdy mınıstr Telegram kanalynda.
Onyń atap ótýinshe, Bilim mınıstrligi erekshe balalarǵa jaǵdaı jasaý úshin úkimettik emes uıymdarmen tyǵyz jumys isteıdi.
«Asyl Mıras», «Dara», «Bolashaq» qorlary, «AUTISM KAZAKHSTAN» Ulttyq qaýymdastyǵy jáne basqa da uıymdarǵa atqarǵan aýqymdy jumystary úshin alǵys aıtamyn. Olar ınklıýzıvti qoldaý kabınetterin, balalarǵa arnalǵan resýrstyq ortalyqtardy ashyp, pedagogterdiń biliktiligin arttyrýdy uıymdastyrady, sondaı-aq ýnıversıtettermen yntymaqtastyq ornatyp, zańnamaǵa ózgerister engizýge bastamashylyq jasap keledi. Keshe konferentsııa ótkizdik. Oǵan úkimettik emes uıymdar men qoǵamdyq birlestikterdiń ókili, ata-analar qaýymy, pedagogter, ǵalymdar men oqytýshylar, JOO rektorlary, sondaı-aq kafedralar men oqý bólimderiniń jáne oqý-ádistemelik kabınetteriniń 400-den astam ókili qatysty», - dedi Ashat Aımaǵambetov.
