Elimizde atys qarýyn zańsyz ustaý máselesi qalaı sheshilip jatyr

NUR-SULTAN. QazAqparat – Qazaqstanda zańsyz ıemdengen qarý-jaraqty tárkileý sharasy júrip jatyr, dep habarlaıdy QazAqparat tilshisi.

«Bıyl aqpan aıynan beri el aýmaǵynda «Qarý» jedel aldyn alý is-sharasy ótip jatyr. Shara qarýdy qoldaný arqyly jasalatyn qylmystardyń aldyn alýǵa baǵyttalǵan. Búginde polıtsııa organdarynda 235 myńǵa jýyq azamattyq qarý ıesi jáne 2 myńnan astam qyzmettik qarý sýbektisi esepte tur. Qabyldanǵan sharalardyń nátıjesinde 2 aıda zańsyz aınalymnan 1 000 birlikten astam atys qarýy alyndy. Sondaı-aq, 7 myńnan astam qarý oǵy tárkilendi», - dedi QR ІІM ókili Shuǵyla Turlybek brıfıng barysynda.

Onyń aıtýynsha, jedel aldyn alý sharasy aıasynda elimizde 1900-ge jýyq zańdy tulǵa jáne 92 qarý-jaraq dúkeni tekserildi.

«Odan bólek, shara barysynda 73 myńnan astam fermerlik, sharýa qojalyqtary tekserilip, 205 myńnan astam azamattyq qarý ıeleri turǵylyqty jeri boıynsha qaraldy. Tekserý nátıjesinde 4,8 myń zańbuzýshylyq anyqtaldy. Onyń ishinde qarýdy saqtaý jáne alyp júrý 3200, al ony tirkeý jáne qaıta tirkeý tártibi boıynsha 1,5 myń ereje saqtalmaǵan», - deıdi ol.

Sondaı-aq, ІІM ókili qarý men oq-dárilerdi zańsyz saqtaǵany úshin qylmystyq jáne ákimshilik jaýapkershiliktiń baryn eske saldy.

«Qarý-jaraqty zańsyz saqtaǵany jáne alyp júrgeni úshin qylmystyq jaýapkershilikti kózdeıtin 325 materıal tirkeldi. Sol sııaqty 519 azamat ákimshilik jaýapkershilikke tartyldy. Esterińizge sala keteıin, zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan adamnyń ózge qylmysy bolmasa, jaýapkershilikten bosatylady», - deıdi ókil.

Osy oraıda ІІM qazaqstandyqtardan zańsyz saqtalǵan qarý-jaraq, oq-dári, jarylǵysh zattar jáne arnaıy quraldardy óz erkimen tapsyrýǵa shaqyrady.