Elimizde at sportynyń jańa túri paıda boldy
ASTANA. QazAqparat - Qazaqstanda álemde teńdesi joq uzaq qashyqtyqtarǵa arnalǵan at sportynyń múldem jańa túri - Joryq paıda boldy. Bul - alǵash ret 2022 jyly ótken «Uly dala joryǵy» marafon-báıgesiniń nátıjesi, dep habarlaıdy QazAqparat «Uly dala joryǵy» marafon-báıgesiniń uıymdastyrý komıtetine silteme jasap.
Qazaqstanda taı-báıge, qunan-báıge, alaman báıge, jorǵa báıge sekildi at jarysynyń birneshe túri belgili. Alaıda, olardyń bireýi de Joryq sııaqty uzaq qashyqtyqqa sozylmaıdy.
2022 jyly «Uly dala joryǵy» marafon-báıgesiniń alǵash maýsymy ótti. Bul oqıǵa at sporty álemindegi naǵyz jańalyq boldy. Birinshi marafonnyń qashyqtyǵy - 1 200 shaqyrym. Onyń qashyqtyǵy men qıyndyǵyna qaramastan, 95 tulpardyń 26-sy oıdaǵydaı márege jetti. Bul jetistik Joryqtyń ómirsheńdigin dáleldep, álemdik at sportyna ózindik jańashyldyq engizip otyr.
Mońǵolııada osyndaı at marafony ótkiziletini belgili. Alaıda, onda qashyqtyq - 1 000 shaqyrym. Bul rette ár 40 shaqyrym saıyn jylqy aýystyrylyp otyratynyn eskergen jón. Al bizdiń jaǵdaıda marafon qashyqtyǵynyń jartysy - 650 shaqyrymnan keıin bir ret qana at aýystyryý ruqsat etiledi. Bul taǵy bir márte qazaq jylqylarynyń erekshe tózimdiligin rastaıdy.
Qazaqstanda Joryq bıyl erekshe nazar aýdarýǵa laıyq. Sebebi, bul maýsymda qashyqtyq 1 300 shaqyrym bolady. Shabandozdar Astanadan Túrkistanǵa deıingi baǵytty 14 kún ishinde ótýi tıis. Bul mindetti az ýaqyt ishinde oryndap shyǵatyn komanda «Uly dala joryǵy» marafon-báıgesiniń absolıýtti jeńimpazy atanady.
«Uly dala joryǵy-2023» marafon-báıgesiniń maýsymy 3 kúnnen keıin - 6 qyrkúıekte saǵat 14:00-de Qarajar (Ilınka) aýylynda bastalady. Bul tek at sporty jankúıerleriniń ǵana emes, sondaı-aq jańa syn-tegeýrinder men emotsııalarǵa qushtar qazaqstandyqtardyń da nazaryn ózine aýdaratyn tyń oqıǵa bolmaq.
