Elimizde asyl tuqymdy jylqy sany qansha

NUR-SULTAN. QazAqparat – Premer-Mınıstrdiń orynbasary Roman Sklıar elimizdegi asyl tuqymdy mal basynyń sanyna qatysty túsinik berdi, dep habarlaıdy QazAqparat tilshisi.

«Búgingi kúni asyl tuqymdy maldyń úles salmaǵy ósýiniń oń serpini saqtalýda. Mysaly, eger 2010 jyldyń 1 qańtaryna sharýashylyqtyń barlyq sanattaryndaǵy asyl tuqymdy iri qara maldyń (ІQM) sany 344,1 myń basty qurasa nemese asyl tuqymdy maldyń jalpy mal basyna shaqqandaǵy úles salmaǵy 2,9% qurasa, 2021 jyldyń 1 qańtaryna sharýashylyqtyń barlyq sanattaryndaǵy asyl tuqymdy ІQM sany 978,6 myń basty qurady nemese asyl tuqymdy maldyń jalpy mal basyna shaqqandaǵy úles salmaǵy 12,5%-ǵa deıin ósti, onyń ishinde negizgi mal basy qazaqtyń aqbas jáne áýlıekól tuqymdaryna tıesili», - delingen Úkimet basshysy orynbasarynyń depýtattar saýalyna bergen jaýabynda .

Onyń aıtýynsha, reprodýktor sharýashylyqtar arqyly jyl saıyn 109 myńnan astam asyl tuqymdy tól elimizdiń fermerlik sharýashylyqtaryna ótkiziledi.

«Sondaı-aq asyl tuqymdy usaq mal basynyń (UM) da ósýi baıqalady. Mysaly sońǵy 10 jylda asyl tuqymdy UM sany 959,5 myń bastan 2 725,7 myń basqa jetti nemese 139,1%-ǵa ósti, asyl tuqymdy jylqy sany 109 myń bastan 225,7 myń basqa jetti nemese 207 paıyzǵa ósti. Sonymen qatar, sońǵy jyldary etti baǵyttaǵy tuqymdyq buqalardy paıdalana otyryp, ІQM-niń analyq basymen selektsııalyq jáne asyl tuqymdyq jumys baǵdarlamasyna (tuqymdyq túrlendirý) qatysýshy sharýashylyqtar sanynyń ósýi baıqaldy», - deıdi R. Sklıar.

Mysaly, 2016 jyly ІQM tuqymdyq túrlendirýmen aınalysatyn sharýashylyqtardyń sany 15,8 myńdy qurady, 2020 jyldyń qorytyndysy boıynsha 25,3 myń fermerlik sharýashylyq tuqymdyq túrlendirýmen aınalysýda.

«Aıta ketý kerek, memlekettik qoldaý sharalary esebinen uıymdastyrylǵan sharýashylyqtarda mal ónimdiliginiń ósýi baıqalady, aýyl sharýashylyǵy kásiporyndaryndaǵy maldyń ortasha tirideı salmaǵy sońǵy bes jylda 2,5%-ǵa nemese 400 keliden 411 kelige deıin ósti», - dedi ol.

Budan buryn habarlanǵandaı, Májilistiń jalpy otyrysynda depýtat Amanǵalı Berdalın elimizdiń klımat ereksheligine beıimdelgen otandyq asyl tuqymdy mal sapasyn arttyrý máselesin kóterip, depýtattyq saýalyn Premer-Mınıstrdiń orynbasary Roman Sklıarǵa joldady.