Elimizde áskerı tehnıkalar jazǵy paıdalaný rejimine kóshirilýde

ASTANA. QazAqparat - Qazaqstannyń Qarýly kúshterinde tehnıka men qarý-jaraqty jazǵy paıdalaný kezeńine daıyndaý jóninde josparly is-sharalar bastaldy, dep habarlaıdy Qorǵanys mınıstrliginiń baspasóz qyzmeti.

Bul baǵyttaǵy belsendi jumysty «Ońtústik» óńirlik qolbasshylyǵyna qarasty 01731 áskerı bóliminiń áskerı qyzmetshileri alǵashqylardyń biri bolyp bastady. Tehnıkany jazǵy rejimge kóshirý boıynsha is-sharalar dástúrli bolyp sanalady. Jyl saıyn áskerı tehnıkanyń árqaısysyna, qarý-jaraq pen áskerı tehnıkaǵa, park-garaj jabdyǵyna maýsymdyq qyzmet kórsetý jóninde keshendi jumystar júrgiziledi. Qarý-jaraq pen áskerı tehnıkaǵa maýsymdyq qyzmet kórsetý jylyna 2 ret júzege asyrylady. Jazǵy kezeńge paıdalanýǵa daıyndalatyn tehnıkalar qatarynda zymyran-artıllerııalyq qarý-jaraǵy, avtomobıldi jáne brondy tank tehnıkasy bar.

Áskerı qyzmetshiler janar-jaǵarmaı materıaldarynyń qysqy túrlerin jazǵysyna aýystyrdy. Aldyn alý is-sharalary barysynda qozǵaltqyshtar, júris bólikteri men t.b. jumysyn qamtamasyz etetin júıelerge qyzmet kórsetilip, daıyndalady. Tehnıka men qarý-jaraq udaıy negizde bútin kúıde jáne jaýyngerlik ázirlikte bolýy tıis. Buǵan atalmysh tehnıkany uqypty ustaý jáne ony ýaqytyly baptaý negizinde qol jetkizýge bolady.