Elimizde artyq júk tıegeni úshin jaýapkershilik kúsheıtildi - QR KKM
ASTANA. 5 tamyz. QazAqparat - Qazaqstanda ruqsat etilgen parametrden artyq júk tıegeni úshin jaýapkershilik kúsheıtildi. Osyǵan oraı, «Avtomobıl kóligi týraly» QR zańyna tıisti ózgertýler men tolyqtyrýlar engizildi. Bul ózgertýler men tolyqtyrýlar aýyr júk kólikteriniń avtomobıl joldaryna tıgizer zalalynan qorǵaý jáne onyń ornyn toltyrýdy qamtamasyz etý maqsatynda engizilip otyr. Bul týraly QR KKM baspasóz qyzmetinen habarlandy.
Sondaı-aq, avtomobıl kóligin baqylaý salasynda qozǵalys barysynda salmaq gabarıtin baqylaýdyń avtomattandyrylǵan júıesin engizý jóninde ózgerister engizildi. Sol arqyly jol boıynda avtokólik quraldaryn qaıta-qaıta toqtatý men tekserýdi doǵarý qamtamasyz etiledi. Sonymen birge otandyq tasymaldaýshylardyń tasymal úderisine qatysý úlesin arttyrý úshin sheteldik tasymaldaýshylarǵa tranzıttik ruqsat etý blankterin satý toqtatyldy. Sheteldik avtokólik quraldarynyń ekijaqty ruqsat qujattaryn almasý týraly kelisim jasamaǵan memleketter arqyly tranzıttik júrip ótýi 2014 jylǵy 1 qańtarda kúshine enetin tranzıttik júrip ótý qujaty negizinde júzege asyrylatyn bolady.
Ruqsat qujattaryn ýaqytynda, ári obektıvti bólý jáne onyń aıqyndylyǵy men qaıta satýdy boldyrmaýdy qamtamasyz etý maqsatynda otandyq tasymaldaýshylarǵa sheteldik ruqsat berý blankterin avtomatty túrde úlestirý júıesin paıdalaný normasy engizildi. Endigi jerde ruqsat qujatyn alýǵa ótinish egov.kz elektrondyq úkimet portaly arqyly beriledi, al daıyn qujatty tek Halyqqa qyzmet kórsetý ortalyqtarynan alýǵa bolady. Bul tasymaldaýshylardyń kóliktik ınspektorlarmen ózara áreketin boldyrmaýǵa jáne ótinishti qaraý ýaqytyn 1 kúnge deıin qysqartýǵa múmkindik berdi.
Aýyr júk kólikteri men iri gabarıtti júkterdi tasymaldaýǵa ruqsatty endigi jerde ótkizý pýnktterinde Kedendik organ da beretin bolady. Bul norma sheteldik tasymaldaýshylardyń kóliktik baqylaýdyń aımaqtyq ınspektsııalarynan ruqsatty alý kezinde shekarany kesip ótý qajettiligin boldyrmaý maqsatynda qabyldanǵan bolatyn.
Sheteldik tasymaldaýshylardyń QR zańnamasy men Halyqaralyq kelisimderdi saqtaýyn qamtamasyz etý maqsatynda QR avtomobıl tasymalynyń ruqsat júıesin halyqaralyq baǵytta qoldaný erejesin buzǵany úshin aıyppul sanktsııalary da engizilip otyr. Mysaly, sheteldik jeke nemese zańdy tulǵalardyń QR aýmaǵynda halyqaralyq avtomobıl tasymalyn arnaıy ruqsat qujatynsyz júzege asyrǵany úshin avtokólik quraldarynyń ıelerine salynatyn aıyppul kólemi 25 AEK (aılyq eseptik kórsetkish), al avtokólik ıesi bolyp tabylatyn kompanııalar úshin 500 AEK qurap otyr.
Budan basqa, reıs aldyndaǵy tehnıkalyq baıqaýdan ótpegen avtokólik quraldaryn reıske qosqan, reıs aldynda arnaıy medıtsınalyq baqyldaýdan ótpegen júrgizýshilerge ruqsat bergen, qaýipti júkterdi tasymaldaýǵa arnaıy ruqsaty joq nemese tasymaldaý erejesin buzǵany jáne t.b. úshin salynatyn aıyppuldar zańmen qarastyrylǵan.
Sondaı-aq, iri gabarıtti jáne aýyr júk kólikteriniń júkti ruqsat etilgen parametrden artyq tıegeni úshin jáne arnaıy ruqsat qujatynsyz júrip ótkeni úshin ákimshilik jaýapkershilikke tartý da qarastyrylǵan. Bul jaǵdaıda jeke kásipkerler men jeke tulǵalarǵa salynatyn aıyppul kólemi 200 AEK, shaǵyn jáne orta kásipkerlik sýbektileri bolyp tabylatyn zańdy tulǵalar úshin 500 AEK, iri kásipkerlik sýbektileri bolyp tabylatyn zańdy tulǵalar úshin 1000 AEK quraıdy.
Respýblıkanyń kólik týraly zańyn júıeli túrde buzǵany úshin jeke tulǵalar 6 aıǵa deıin kólik quraldaryn júrgizý quqyǵynan aıyrylyp, kólik quralyn paıdalanýǵa jaýapty tulǵalarǵa 25-ten 30 AEK kóleminde aıyppul salynatyn bolady.
«Ákimshilik quqyqbuzýshylyqtar týraly kodeksi» kóliktik baqylaý organdarynyń sheteldik kompanııalarǵa tıesili kólik quraldaryn ákimshilik shara qoldaný týraly qaýly qabyldanǵanǵa deıin kólik quraldaryn kóliktik baqylaý ınspektsııasy janyndaǵy arnaıy alańmen ýaqytsha qamtamasyz etý arqyly toqtata turý týraly normamen tolyqtyrylǵan.
Budan basqa, 2014 jylǵy 1 qańtardan bastap avtomobıl kóligimen halyqaralyq júk tasymalyn júzege asyrýǵa ruqsat kýáligin nemese onyń telnusqasyn berý kezinde aılyq eseptik kórsetkishtiń 25 paıyzyn quraıtyn mólsherde baj salyǵy salynatyn bolady.
Bul sharalar joldardaǵy qaýipsizdikti kúsheıtýge, kóliktik baqylaý salasyndaǵy memlekettik baqylýdyń tıimdiligin arttyrýǵa, ákimshilik kedergilerdi boldyrmaýǵa jáne ınfraqurylymdy damytýǵa baǵyttalǵan.
