Elimizde arnasyn batpaq pen qalyń shóp basqan ózender ataldy

NUR-SULTAN. QazAqparat – Qazaqstanda qandaı ózenderdiń arnasyn qalyń shóp pen batpaq basý qaýpi bar? Bul suraqqa QR Tsıfrlyq damý, qorǵanys jáne aeroǵarysh ónerkásibi mınıstrligi aeroǵarysh komıtetiniń tóraǵasy Baýbek Oralmaǵambetov jaýap berdi, dep habarlaıdy QazAqparat tilshisi.

«Biz memlekettik organdardyń tapsyrysymen elimizdegi sý qoımalarynyń rejımi men ózen-kólderge ǵaryshtyq monıtorıng arqyly baqylaý júrgizemiz. Sondaı-aq, aýyl sharýashylyǵy jáne mal jaıylymy úshin qoldanylatyn sý qoımalary da qadaǵalanady. Odan bólek, ǵaryshtyq monıtorıng arqyly sý tasqynyn boljaý jáne aldyn alýdyń da múmkindigi bar. Boljamdy biz Qazgıdromet usynǵan derekterdiń negizinde ǵaryshtyq túsirilim arqyly jasaımyz. Sý tasqyny boıynsha boljamdy synaq Ertis ózinene júrgizildi», - dedi Baýbek Oralmaǵambetov OKQ-de ótken baspasóz máslıhatynda.

Sondaı-aq, spıker elimizde ózender arnasynyń batpaqtanýy men qalyń shóptiń qaptaýy boıynsha da ǵaryshtyq monıtorıng júrgizilgenin aıtty.

«2020-2021 jylǵy ǵaryshtyq monıtorıng deregi boıynsha Іle, Jaıyq, Syrdarııa, Ertis, Esil, Shilik, Nura, Sarysý, Tobyl, Aqsý, Asa jáne Shý ózeni arnasynda qalyń shóp ósken 2 myń gektar jer anyqtaldy. Sondaı-aq, atalǵan ózenderdiń 47,7 myń gektar aýmaq jer batpaq basqan. Óz kezegimizde bul aqparatty tıisti shara qabyldaý úshin quzyrly organdarǵa jiberdik», - deıdi ol.

Buǵan deıin komıtet basshysy Qazaqstanda Ilon Mask kompanııasynyń spýtnıktik ınterneti synaqtan ótkiziletini týraly habardar etti.