Elimizde árbir úshinshi qylmys áıelderge qatysty jasalady
ASTANA. 26 sáýir. QazAqparat - 2012 jyly elimizde turmystyq sıpatta órbigen árbir úshinshi qylmys áıelderge qatysty jasaldy. Bul týraly búgin QR Prezıdenti janyndaǵy Áıelder jáne otbasylyq-demografııalyq ister jónindegi ulttyq komıssııa otyrysynda QR Bas prokýrorynyń orynbasary Jaqyp Asanov málim etti.
«Bul 298 qylmys nemese atalǵan sanatta jasalǵan barlyq qylmystyń 38 paıyzy», - dep naqtylady ol.
Onyń atap ótýinshe, statıstıkalyq derekterge qaraǵanda, turmystyq zorlyq-zombylyqtyń aldyn alý salasyndaǵy ahýal kóńil kónshiterlik emes.
«Ýchaskelik ınspektsııa qyzmetterimen turmystyq qylmys salasynda aldyn alý jáne joıý jumystary is júzinde júrgizilmeıdi», - dedi J.Asanov.
