Elimizde árbir ekinshi sot sheshimi oryndalmaı otyr - Ádilet mınıstrligi
ASTANA. 15 mamyr. QazAqparat - Jyl saıyn elimizde árbir ekinshi sot sheshimi oryndalmaı otyr.
Bul týraly búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Ádilet vıtse-mınıstri Dýlat Qusdáýletov málim etti.
Vıtse-mınıstrdiń aıtýynsha, atqarýshylyq is júrgizý salasyndaǵy daǵdarystyń basty sebepteriniń biri strategııalyq, tujyrymdamalyq, quqyqtyq qatelikter bolyp tabylady. «Bul negizinen sot aktileriniń oryndamaýdy onsha aýyr emes qylmystyq sanatqa jatqyzýdan týyndap otyr. Qoǵamdyq qaýipsizdikte atalǵan qylmystyq saldar esepke alynbaýda. Sondyqtan da, ádildik jáne jazany jekelendirý usynymy óreskel buzylady», deıdi D. Qusdáýletov.
Onyń sózine qaraǵanda, qoldanystaǵy Qylmystyq kodekste ortasha aýyr qylmystary úshin úsh jylǵa deıin jaza belgilengen. «Al keltirilgen shyǵyndy óndirý tártibinde júzdegen mıllıondaǵan teńge óndiriletin sot aktilerin oryndamaý áreketi jeńil qylmys sanatyna jatqyzylǵan. Boryshkerlerge qylmystyq protsessýaldyq áser etýdiń qoldanystaǵy tetigi tolyq iske aspaı otyr. Sondyqtan da, sot bıliginiń ǵana emes jalpy memlekettiń bedeli túsýde», dedi Ádilet vıtse-mınıstri.
