Elimizde ár jyl saıyn qaterli isik aýrýlaryna shaldyǵýdyń 30 myńnan astam oqıǵasy anyqtalady - Úkimet otyrysy
ASTANA. 28 mamyr. QazAqparat - Jyl saıyn Qazaqstanda qaterli isik aýrýlaryna shaldyǵýdyń 30 myńnan astam oqıǵasy anyqtalady.
Bul týraly búgin selektorlyq rejimdegi Úkimet otyrysynda Densaýlyq saqtaý mınıstri Salıdat Qaıyrbekova málim etti.
Onyń sózine qaraǵanda, elimizde onkologııalyq aýrý boıynsha kórsetkishterdiń ońtaıly dınamıkasy oryn alǵanyna qaramastan ahýal áli de kúrdeli bolyp otyr.
«Jyl saıyn 30 myńnan astam onkologııalyq aýrýǵa shaldyǵýdyń jańa oqıǵalary anyqtalyp otyr. Onyń ishinde 47,2 paıyzy qaterli isiktiń bastapqy kezeńinde aıqyndalady»,-dedi mınıstr.
S. Qaıyrbekovanyń aıtýynsha, búginde onkologııalyq tirkeýde 140 myńnan astam aýrýlar tizimde tur. «Álemde qaterli isik aýrýlary ortasha eseppen jyl saıyn 5 paıyzǵa artyp otyrady. Bul óz kezeginde qabyldanǵan baǵdarlamanyń mańyzdylyǵyn kórsetedi»,-dedi S. Qaıyrbekova.
Aıta keteıik, Densaýlyq saqtaý mınıstrligi Qazaqstan Respýblıkasyndaǵy onkologııalyq kómekti damytýdyń 2012-2016 jyldarǵa arnalǵan baǵdarlamasyn daıarlap, ol QR Úkimetiniń qaýlysymen bekitildi. Baǵdarlamanyń maqsaty - qaterli isik aýrýlarynan Qazaqstan azamattarynyń ólim-jitimin tómendetý. Osy maqsatqa qol jetkizý úshin úsh negizgi mindet aıqyndaldy. Onyń ishinde onkologııalyq aýrýlardyń profılaktıkasyn jetildirý, ıaǵnı skrınıngterdi damytý, emdeý men dıagnostıka ádisterinde joǵary tehnologııalarǵa qoljetimdiligin arttyrý, sondaı-aq onkologııalyq aýrýlarǵa qazirgi zamanǵy ońaltý júıesin qurý sharalary qarastyrylǵan.
