Elimizde ár tórtinshi adam sottyń kómegine júginedi
PETROPAVL. QazAqparat - Elimizde ár tórtinshi adam sottyń kómegine júginedi. Sýdıalardyń aıtýynsha, Soltústik Qazaqstan oblysynda basqa óńirlermen salystyrǵanda «daýkestik» deńgeıi joǵary. Jyldyń toǵyz aıy ishinde oblystyq sotta 9530 azamattyq is qaralǵan, dep habarlaıdy QazAqparat.
Sotta qaralǵan azamattyq isterdiń 902-si eki jaqtyń mámilege kelýimen toqtatyldy. Memleketke qaıtarylǵan baj salyǵynyń mólsheri 62 514 556 teńge. Bul ótken jylmen salystyrǵanda 45 paıyzǵa artyq.
«Tek azamattyq ister boıynsha daýǵa keminde 2 adam qatysatynyn eskersek, sottasýshy adamdar sany halyqtyń 9,6 paıyzyn qurap otyr. Statıstıkalyq málimetterge saı, órship turǵan daýlardyń kópshiligi otbasylyq daýlar. Onyń ishinde neke buzý, balasyn, ata-anasyn, jubaıyn asyraý úshin alıment óndirip alý daýlary. Elimizde árbir úshinshi otbasynyń shańyraǵy shaıqalyp, neke buzylýda» - deıdi QR Joǵarǵy sot tóraǵasynyń keńesshisi Saǵatbek Súleımen.
Ajyrasýdyń zardabyn eń aldymen balalary tartatyny belgili. Orta eseppen ár otbasynda eki bala dep alsaq, bir jylda júz myńnan astam bala «tiri jetimderdiń» qataryn tolyqtyrýda . Soltústik Qazaqstan oblysynda byltyr 2176, al bıyl jarty jyldyń ishinde 1039 otbasynyń nekesi buzylǵan.
«Sot ár daý boıynsha taraptardy tatýlastyrýǵa mindetti. Tatýlastyrý máselesiniń úsh túri bar. Olardyń artyqshylyqtary kóp, ýaqyt pen qarajatty únemdeıdi, taraptarǵa daýdy ózara sheshýge múmkindik beredi», - deıdi SQO sottyń azamattyq ister jónindegi sot alqasynyń tóraǵasy Aıdar Smaǵulov.
Araz azamattardy mámilege keltirý úshin búginde oblys sottarynda 22 medıatsııa kabıneti ashylǵan. Aýdandarda 300-den astam kásibı emes medıatorlar, oblys ortalyǵynda 32 kásibı medıator jumys isteıdi.
Aqerke Qabykeeva
