Elimizde analar men ájelerdi fýtbol oınaýǵa tartatyn joba iske qosylady

ASTANA. QazAqparat – Qazaqstan kásipqoı fýtbol lıgasy jáne QJ League prezıdenti Rohýs Shoh elimizde qyzdar arasynda jasóspirimder lıgasyn qurý bastamasy jaıynda aıtyp berdi, dep habarlaıdy QazAqparat tilshisi.

«Qyzdar arasynda fýtboldan jasóspirimder lıgasyn qurý 2025 jylǵa josparlanyp otyr. Ol úshin U-17 formaty tańdalady. Aldyn ala boljam boıynsha 10-12 komanda qatysady»,-dedi Rohýs Shoh elordada ótken baspasóz máslıhatynda.

Óz kezeginde Qazaqstan fýtbol federatsııasynyń prezıdenti Ádilet Barmenqulov fýtbol sportyna analar men ájelerdi tartý jospary týraly aıtty.

«Bul múldem jańa joba. Ótken jyly biz áıelder fýtbolynyń ne ekenin, ony damytý joldaryn zerttedik. Bylaı qarasań, elimizde áıelder fýtboly bar da, joq ta sııaqty. Biz áıelderge arnalǵan aýqymdy fýtbol baǵdarlamasyn daıyndap jatyrmyz. Baǵdarlama tek qyzdar men kásibı fýtbolshylarǵa ǵana emes, sonymen qatar fýtbolǵa qumar analar men ájelerge de arnalady», - deıdi fýtbol federatsııasynyń basshysy.

Onyń aıtýynsha, analar men ájelerge arnalǵan fýtbol baǵdarlamasy bıyl nemese kelesi jyly iske qosylady.

«Bul jerde birinshi másele – mamandar. Sebebi, oǵan basqa jattyqtyrýshylar, basqa tásil kerek. Óıtkeni, fýtbol túri ózgeshe. Eger daıyndyq jumystaryn bıyl aıaqtasaq, jobany bastaımyz. Eger úlgermesek keler jyly jarııalaımyz dep oılaımyn», - dedi Á. Barmenqulov.

Buǵan deıin habarlaǵanymyzdaı, elimizde fýtboldan jańa jasóspirimder lıgasy quryldy.

Sport jáne dene shynyqtyrý komıteti basshysynyń málimdeýinshe, elimizde 800 myńnan astam adam fýtbolmen júıeli aınalysady.