Elimizde ana men bala ólimi aıtarlyqtaı azaıyp keledi - Densaýlyq saqtaý mınıstrliginiń alqa májilisi
ASTANA. 1 qyrkúıek. QazAqparat /Aıdar Ospanalıev/ - Ótken jyldyń sáıkes merzimimen salystyrǵanda bıylǵy jyldyń jartysynda respýblıkada ana ólimi 1,8 esege, al bala shetineýi 12,9 paıyzǵa kemigen.
Densaýlyq saqtaý mınıstrliginiń alqa májilisinde keltirilgen málimetter osyndaı. Bul málimetterdi búgin mınıstrliktiń baspasóz qyzmeti taratty.
Baspasóz málimetterine qaraǵanda, Úkimet pen mınıstrlik deńgeıinde qolǵa alynǵan keshendi sharalar qurt aýrýy men jańa aýrý túrlerinen mert bolǵan adamdar sanynyń qysqarýyna yqpal etti. Sondaı-aq túrli deńgeıdegi dene jaraqattary men ýlaný oqıǵalary 11 paıyzǵa kemip, jaraqattyń saldarynan mert bolý jaǵdaılary 5,4 paıyzǵa azaıǵan. Al respýblıka kóleminde engizilgen Ulttyq skrınıngteý baǵdarlamasy boıynsha bıylǵy jyldyń jartysynda 856 myń 900 eresek adam arnaıy tekserýden ótken. Osy tekserýler barysynda 84 myń 500 túrli dertter anyqtalǵan. Syrqaty anyqtalǵan barlaq azamattar emdelýge jiberilip, arnaıy dıspanserlik esepke qoıyldy.
Esterińizge sala keteıik, alqa májilisi barysynda Densaýlyq saqtaý mınıstrliginiń ókilderi 2011-2015 jyldardy qamtıtyn «Salamatty Qazaqstan» memlekettik baǵdarlamasynyń bıylǵy jartyjyldyqtaǵy júzege asyrylýy men ony aldaǵy jartyjyldyqta damytý máselesi talqylandy. Otyrys barysynda atalmysh baǵdarlamalar boıynsha keshendi sharalar atqarylǵandyǵy aıtyldy. Buny densaýlyq saqtaý salasyndaǵy jemisti kórsetkishter rastap otyr.
