Elimizde alıýmınııdiń tek 17% óńdelip, qalǵany eksportqa jiberiledi

ASTANA. QazAqparat – Elimizdegi óńdeý ónerkásibindegi alıýmınıı salasynyń úlesi 3,2 paıyz ǵana. Bul týraly «Jer qoınaýyn paıdalaný jáne ınvestıtsııalyq ahýaldy jaqsartý máseleleri týraly» QR zańynyń konsýltatıvtik qujatynda jazylǵan, dep habarlaıdy QazAqparat tilshisi.

Málim bolǵandaı, elimizde barlanǵan 27 boksıt ken orny bar. Onyń ishinde 15 orynnyń boljamdy qory - 291,7 mln tonna. Barlyq ónerkásiptik mańyzy bar boksıt Torǵaı dalasynda (Qostanaı oblysy) shoǵyrlanǵan.

«Qostanaı oblysynda Qazaqstan boksıt qorlarynyń 97,4% shoǵyrlanǵan. Al, Aqtóbe oblysynda - 2,6%. Óńdeý ónerkásibindegi alıýmınıı salasynyń úlesi 3,2% nemese 0,66 trln teńgeni quraıdy. Boksıt óndirýmen aınalysatyn jalǵyz kásiporyn – «Qazaqstan alıýmınııi» AQ, al ony bastapqy óńdeýmen «Qazaqstandyq elektrolız zaýyty» AQ aınalysady. Bul salada shamamen 10 myń adam jumys isteıdi», - delingen Ónerkásip jáne qurylys mınıstrliginiń derekterinde.

Konsýltatıvtik qujatta jazylǵandaı, alıýmınııdiń shamamen 17 paıyzy ǵana elimizde bastapqy óńdeýden ótedi. Basym bóligi eksportqa shyǵarylady. Byltyr shet memleketterge 233,4 myń tonna alıýmınıı jóneltilgen.