Elimizde alǵashqy JOO jemqorlyqqa qarsy halyqaralyq standartqa sáıkestigin rastady
Budan buryn Sybaılas jemqorlyqqa qarsy is-qımyl agenttigi Bilim jáne ǵylym mınıstrligimen birlesip, oqý oryndarynda sybaılas jemqorlyqqa qarsy saıasatty ilgeriletýdi kózdeıtin JOO-da ashyqtyq standartyn ázirledi.
«Atalǵan standartty ázirleý kezinde uıymdaǵy sybaılas jemqorlyq táýekelderin tómendetýge arnalǵan jáne bedelin jaqsarta otyryp, iskerlik qarym-qatynastardaǵy senimge yqpal etetin, «Sybaılas jemqorlyqqa qarsy is-qımyl menedjmentiniń júıesi» ISO 37001 halyqaralyq sybaılas jemqorlyqqa qarsy standartynyń talaptary eskerilgenin atap ótken jón. Osyǵan baılanysty, «Sanaly Urpaq» jobalyq keńsesi barlyq oqý oryndarynda ISO 37001 engizý boıynsha usynysty bastamashylyq etti. Osylaısha, Abaı atyndaǵy Qazaq ulttyq pedagogıkalyq ýnıversıtetinde ISO 37001 halyqaralyq standartynyń talaptaryna sáıkes sybaılas jemqorlyqqa qarsy is-qımyl menedjmenti júıesin ázirleý jáne engizý basym mindetterdiń biri bolyp belgilendi» delingen habarlamada.
Atqarylǵan jumys sheńberinde birqatar qujattar bekitildi, olardyń árqaısysynyń erejeleri Qazaqstan Respýblıkasy zańnamasynyń normalaryn eskere otyryp, ISO 37001 talaptary boıynsha sybaılas jemqorlyqqa qarsy is-qımylǵa baǵyttalǵan.
Ázirlengen ádistemege sáıkes ýnıversıtettiń qurylymdyq bólimsheleriniń qyzmetindegi sybaılas jemqorlyq táýekelderine baǵalaý júrgizildi. Táýekelder tsıfrlandyryldy jáne mańyzy boıynsha saralandy, sondaı-aq olardy azaıtý jáne joıý boıynsha jaýapty tulǵalar men is-sharalar anyqtaldy.
Nátıjesinde 18 maýsymda «EVROCERT» eýropalyq kompanııasy Abaı atyndaǵy QazUPÝ-dyń ISO 37001 «Sybaılas jemqorlyqqa qarsy is-qımyl menedjmenti júıesi» halyqaralyq standartynyń talaptaryna sáıkestik sertıfıkatyn berdi.
