Elimizde alǵash ret naýqasqa jasandy júrek salý otasy jasalady

Bul týraly búgin elordada uıymdastyrylǵan baspasóz máslıhaty barysynda «Ulttyq ǵylymı kardıohırýrgııa ortalyǵy» AQ basqarmasy tóraǵasynyń orynbasary, QR densaýlyq saqtaý mınıstrliginiń shtattan tys bas hırýrgi Mahabbat Bekbosynova málim etti.

«Biz aǵymdaǵy jyldyń qarashasynda jasandy júrekti ımplantatsııalaýdy júzege asyramyz. Qazirgi ýaqytta naýqasty ázirleý ústindemiz», - dedi ol.

Onyń atap ótýinshe, jalpy taıaýda ǵana óz jumysyna kirisken ortalyqta júrekke ota jasaýǵa arnalǵan 6 zal tolyǵymen jabdyqtalyp, naýqastardy qabyldaýǵa daıyn. Olardyń árqaısysy kúnine 2 naýqastyń júregine ota jasaýǵa qaýqarly. Demek medıtsınalyq mekeme jylyna 3,5 myń júrek dertine shaldyqqan adamdy emdeýge shamasy jetedi.

Sonymen qatar atalǵan ortalyqtyń basqarma tóraǵasy ıÝrıı Pıanyń atap ótýine qaraǵanda, medıtsınalyq mekemeniń dárigerleri kelesi jyldan bastap robot hırýrgtarmen jumys isteýge jan-jaqty daıyndyq jasaýda. Qajetti robottardy olar kelesi jyly satyp almaq.

Aıta keteıik, 18 qazan kúni atalǵan ortalyqta alǵash ret júrekke ota jasalǵan bolatyn. Operatsııa týa bitken júrekshe aralyǵyndaǵy kemshiligi bar 6 jastaǵy qyzǵa jasalǵan-dy. Qyzǵa ota jasaǵan atalǵan ortalyqtyń balalar hırýrgııasy bólimshesiniń meńgerýshisi, Densaýlyq saqtaý mınıstrliginiń shtattan tys bas balalar hırýrgi Dmıtrıı Gorbýnovtyń atap ótýinshe, naýqastyń hal-jaǵdaı jaqsy.