Elimizde alǵash ret mýzeı qyzmetine arnalǵan kásibı saıt ashyldy
ASTANA. QazAqparat - Elimizde alǵash ret otandyq mýzeılerdi aqparattyq jáne ádistemelik turǵydan qoldaýǵa arnalǵan www.kazmuseum.kz saıty ashyldy. Bul týraly ıdeıa avtory, mýzeıtanýshy Nurserik Jolbarys málim etti.
«Otandyq mýzeıler aqparattyq qoldaý men ádistemelikke kómekke muqtaj. Qazaqstanda mýzeı qyzmeti týraly jarııalaıtyn kásibı saıttar da múldem joq. Mýzeı mamandary ádistemelik kómek alý úshin ózge tilderdegi saıttardyń qyzmetine júginýge májbúr. Biz osy olqylyqtyń ornyn toltyrý úshin aqparattyq-ádistemelik saıt ashýdy qolǵa aldyq», - dedi N.Jolbarys.
Ideıa avtorynyń aıtýynsha, saıtta tanymdyq turǵydan aqparattar beretin birneshe aıdarlar bar.
«Saıtymyzda elimiz ben sheteldiń mýzeıleri týraly aqparat jarııalaıtyn «Qazaqstan mýzeıleri», «Álem mýzeıleri» jáne ádistemelik kómek beretin «Maman keńesi» aıdarlary ashylǵan. Sonymen qatar, «Mýzeı jáne qoǵam», «Mýzeı jáne EKSPO», «Qolda bar jádiger» aıdarlary buqaramen tyǵyz jumys isteý úshin jasalyp otyr. Saıt turaqty túrde «Jádiger syry» degen atpen QR Ulttyq mýzeıiniń Altyn qorynda saqtaýly turǵan jádigerler týraly jarııalamaq. Sondaı-aq, saıtta mýzeı ujymdary men jekelengen qyzmetkerleri úshin konkýrstar da uıymdastyrylǵan», - dedi ıdeıa avtory. Saıt jetekshisi N.Jolbarys ujymnyń aldaǵy ýaqytta birneshe jobalardy josparlap otyrǵanyn da jetkizdi. «Mýzeı isiniń órkendeýi úshin jasalǵan bul jobanyń aıasynda aldaǵy ýaqytta elimizdegi úzdik mýzeı mamandary onlaın-konferentsııalar ótkizedi. Ázirge qazaq tilinde aqparat taratatyn saıt aldaǵy ýaqytta orys jáne aǵylshyn tilderinde de shyǵatyn bolady», - dedi ol.
