Elimizde alǵash ret kóne zamannyń aǵash kúımesi tabyldy
PAVLODAR. QazAqparat - Ertis óńiriniń arheologtary oljaly boldy. Qazý jumystary kezinde Pavlodar irgesindegi Dolgoe aýylynyń mańynan at arba men adam qańqasy tabyldy, dep habarlaıdy «Habar» telearnasy.
Ǵalymdar: «Bul jádigerler Qımaq dáýirine, ıaǵnı 9-10 ǵasyrlarǵa tıesili», - dep boljaýda. Qýantarlyǵy, kóne qorym tonalmaǵan. Sol sebepti aǵashtan jasalǵan kúıme tutas kúıinde saqtalypty.
Aıta ketý kerek, mundaı artefaktiler qazaq jerinde buryn-sońdy kezdespegen. Arheologtar jádiger synyp qalmas úshin arbany topyraǵymen birge qazyp alyp kelgen. Kúımeniń uzyndyǵy - eki metr, salmaǵy - 1 tonna shamasynda.
Qazir biregeı jádigerdi zertteý úshin Pavlodarǵa Almatydan tanymal restavrator Qyrym Altynbekov bastaǵan bir top maman keldi. Ǵalymdardyń aıtýlarynsha, bul olja Qımaq qaǵanatynyń Ertis óńirinde shoǵyrlanǵanyn taǵy bir aıǵaqtaıdy. Sondyqtan ǵylymı qundylyǵy asa joǵary.
«Biz at arbasyn tapqan bolatynbyz. Sol at arba bizdiń dáýirimizde, bizdiń óńirimizde tabylmaǵan. Sony, mine, zerttep, ony saqtap qalý úshin biz jańa metodıkany engizdik. Blokpen alyp kelip, ony laboratorııalyq turǵydan zertteıtin bolamyz. Bul jádiger Ertis óńirinde emes, sonymen qatar Qazaqstanda da tabylmaǵan. Qazir ony biz restovratorlarmen zertteıtin bolamyz», - deıdi ǵylymı qyzmetker Talǵat Aılybaev.
