Elimizde alǵash ret erekshe balalardyń spartakıadasy ótýde
NUR-SULTAN. QazAqparat - Elordada erekshe balalarǵa arnalǵan «Make it possible» atty respýblıkalyq spartakıada ótip jatyr, dep habarlaıdy QazAqparat tilshisi.
«Búgin mınıstrliktiń uıymdastyrýymen elimizde alǵash ret erekshe kútimdi talap etetin balalar men asyraýshysyz qalǵan balalar arasynda respýblıkalyq spartakıada bastaldy. Bul ıdeıany qoǵam belsendileri usyndy, biz óz kezegimizde bıylǵy jastar jyly aıasynda ótkizýdi jón kórdik. Spartakıadaǵa elimizdiń 8 óńirinen 300-ge jýyq bala qatysyp jatyr. Jas erekshelikteri 13 pen 17 jastaǵy jasóspirimder. Spartakıada jas erekshelikterine qaraı, sporttyń 5 túrinen ótedi. Jalpy sharanyń maqsaty – jaı sportpen qatar, parasportty damytý jáne keńinen nasıhattaý», - dedi QR Mádenıet jáne sport mınıstrligi, Sport jáne deneshynyqtyrý isteri komıteti tóraǵasynyń orynbasary Serik Jarasbaev.
Aıtýly básekede jas sportshylar shaǵyn fýtbol, toǵyzqumalaq, asyq atý, ústel tennısi jáne armrestlıngten baq synaıdy.
«Meniń jasym 15-te men Qarataý qalasynan keldim. Búgingi jarysta qolkúresten qatysamyn. Buǵan deıin oblystyq jarysqa qatysyp 3 oryn ıelendim. Sporttan basqa mánerlep oqyǵandy jaqsy kóremin», - dedi Jambyl oblysy, Qarataý qalasynan kelgen sportshy Ásemaı Áshimbek.
Uıymdastyrýshylardyń aıtýynsha, jarys 2 kúnge sozylady jáne aldaǵy ýaqytta jyl saıyn ótkiziletin bolady.
«Parasportpen bizdiń balalar turaqty túrde 3 jyl aınalysyp jatyr. Ásemaıǵa DTsP dıagnozy qoıylǵan, biraq soǵan qaramastan ómir súrý men soprtpen shuǵyldanýǵa degen qulshynysy joǵary. Bizdiń oblystan 6 bala keldi, olar sporttyń 3 túrinen jarysqa túsedi. Balalardyń damýyna jaqsy áser etetin osyndaı jarystar uıymdastyrylsa deımiz, uıymdastyrýshylarǵa rahmet», - dedi jambyldyq sportshylardyń jattyqtyrýshysy Saltanat Rasylhanova.
