Elimizde alǵash ret Atyraýda korona-taksı jumys isteı bastady
ATYRAÝ. QazAqparat - Qazirgi ýaqytta korona-taksı pnevmonııa jáne koronavırýstan úı jaǵdaıynda emdelip jatqan naýqastarǵa qyzmet kórsetedi, dep habarlaıdy QazAqparat tilshisi.
Densaýlyq saqtaý basqarmasynyń málimetinshe, atalmysh qyzmet túri el boıynsha birinshi ret Atyraý oblysynda uıymdastyrylyp otyr. Ázirge kovıd-taksı túngi kezekte qyzmet kórsetip jatyr. Aldaǵy ýaqytta atalmysh taksı sanyn kóbeıtý josparlanǵan.
Atyraý oblystyq jedel járdem qyzmeti stansasy dırektorynyń mindetin atqarýshy Nargız Baımoldaevanyń aıtýynsha, qazirgi ýaqytta jedel járdem qyzmetine túsip jatqan shaqyrtýlar óte kóp.
«Al, korona-taksı qyzmeti júktemeni azaıtýǵa yqpal etýde. Kovıd taksı tolyqqandy brıgadamen teń dárejede medıtsınalyq qyzmet kórsete alady. Kovıd taksı koronavırýs, pnevmonııaǵa shaldyqqandarmen birge, qyzýy kóterilip turǵan naýqastardyń shaqyrtýyna da barady. Eger koronavırýsqa shaldyqqan naýqas dárigerdiń qabyldaýynan shyǵyp, úıine jete almaı tursa, kovıd-taksı qyzmetin paıdalana alady. Kovıd taksıdiń brıgadasy júrgizýshi men feldsherden turady. Ókinishke qaraı, bizdiń de qyzmetkerlerimizdiń arasynda naýqastanyp jatqandar bar. Qazirgi ýaqytta qolda bar kúshti maksımaldy túrde tıimdi paıdalanýǵa tyrysyp otyrmyz», - deıdi Atyraý oblystyq jedel járdem qyzmeti stansasy dırektorynyń mindetin atqarýshy Nargız Baımoldaeva.
Erekshe atap óterligi, kovıd taksı júrgizýshileri qajet jaǵdaıda alǵashqy medıtsınalyq kómek kórsete alady. Olar bazalyq reanımatsııalyq kómek boıynsha oqytýdan ótken.
Sonymen birge, pnevmonııa, koronavırýsqa shaldyqqan naýqastar kovıd taksı qyzmetin dári-dármek tasymaly úshin de paıdalana alady.
Aıta ketelik, pandemııa bastalǵaly beri Atyraýda jedel járdem shaqyrtý kóbeıgen. Buryn táýligine 700-800 ret shaqyrǵan bolsa, qazirgi jaǵdaıda oblys boıynsha shaqyrý sany táýligine 1300-ge deıin artqan.
Eske sala keteıik, biz buǵan deıin elimizde korona-taksı qyzmeti iske qosylatynyn habarlaǵan bolatynbyz.
