Elimizde áleýmettik kásipkerlik jobasy ázirlenip jatyr

NUR-SULTAN. QazAqparat – Elimizde áleýmettik kásipkerlik ilki jobasy ázirlenip jatyr. Mundaı pikirdi QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet bildirdi, dep habarlaıdy QazAqparat tilshisi.

«Bizge azamattyq qoǵamdy damytýdyń zamanýı tásilderin engizý boıynsha tyń mindet júktelip otyr. Oǵan taıaýda 2025 jylǵa deıin Qazaqstandaǵy Azamattyq qoǵamdy damytý tujyrymdamasynyń qabyldanýy dálel bola alady. Onda azamattyq qoǵamdy jáne onyń ınstıtýttaryn damytý úshin jaǵdaı jasaý, bolyp jatqan qoǵamdyq-saıası protsesterdi, ekonomıkalyq básekelestikti, azamattyq belsendiliktiń túrli formalary men ádisterin eskere otyryp, azamattardy memleket pen qoǵamnyń negizgi mindetterin sheshýge tartý sharalary kózdelgen», - dedi ol «Damý tarıhy: ishteı kózqaras» atty 11-shi jyl saıynǵy halyqaralyq konferentsııasynda.

Onyń atap ótýinshe, atalǵan tujyrymdama jumysynyń tıimdiligin kúsheıtý úshin memlekettiń qoǵamdyq uıymdarmen birlesken júıeli jumysy qajet. Kúsh birikkende ǵana jańa býynnyń quziretti, turaqty ári básekege qabiletti úkimettik emes uıymyn qurýǵa bolady.

«Buǵan qosa, biz úkimettik emes uıymdardyń jumysyna ınnovatsııalyq tásilder engizý jumystaryna bastamashalyq jasadyq. Onyń ishinde áleýmettik kásipkerlikti damytý, úkimettik emes uıymdardyń (ÚEU) turaqtylyǵyn arttyrý, turaqty negizde bıznestiń ÚEU-larmen ózara is-qımylyn jolǵa qoıý kiredi. Búginde úkimettik emes uıymdardyń mindetterin arttyrý boıynsha negizgi maqsattar júzege asyrylyp, Áleýmettik kásipkerlik ilki jobasy ázirlenip jatyr. Bul joba áleýmettik kásipkerlik mádenıetin damytýǵa naqty usynystar qalyptastyrý múmkindigin beredi. Іlki jobada Úkimettik emes uıymdar arasynda osy baǵytty damytýdyń munan arǵy qadamdary kórinis tabady», - dedi komıtet tóraǵasy.