Elimizde ákimshilik aıyppul kólemi 30 paıyzǵa azaıyp otyr - Májilis tóraǵasy
KÓKShETAÝ. QazAqparat - Elimizde ákimshilik aıyppul kólemi ortasha 30 paıyzǵa azaıyp otyr. Bul týraly QR Parlamenti Májilisiniń tóraǵasy Nurlan Nyǵmatýlınniń Aqmola óńirine jumys sapary aıasynda Kókshetaý qalasyndaǵy birqatar áleýmettik-óndiristik nysandarda bolyp, eńbek ujymdarymen kezdesýinde aıtyldy, dep habarlaıdy QazAqparat tilshisi.
Kezdesýde Nurlan Nyǵmatýlın zań shyǵarý jumystary týraly aıtyp berdi. Onyń ishinde respbýlıkalyq bıýdjet týraly zańnama sóz boldy.
Osy rette, Májilis depýtattarynyń áleýmettik qajettilik úshin qosymsha 22 mıllıard teńge qarjy qarastyryp otyrǵanyn atap ótti. Bul qarjy mektep, jol qurylysy, mádenıet jáne sport nysandaryn jóndeýge, sýmen qamtamasyz etýge jáne sý jiberý júıelerin damytýǵa baǵyttalady.
Májilis tóraǵasynyń sózinshe, QR ÁQbK túzetý barysynda depýtattar Elbasynyń ákimshilik jazany kúsheıtpeı-aq, qoldanystaǵy zańnamanyń aldyn alý áleýetin arttyrý jónindegi tapsyrmasyn oryndady. Osynyń nátıjesinde ákimshilik aıyppul kólemi ortasha 30 paıyzǵa azaıdy. Al, usaq quqyqbuzýshylyqqa salynatyn aıyppul sottyq eskertýge almastyryldy. Oǵan qosa, tutynýshylardy aldaý, múgedekter men balalardyń quqyn buzýdaǵy ákimshilik jaýapkershilik sol kúıinde qalyp otyr.
Májilis tóraǵasy qoldaý tapqan zań jobalarynyń arasynda elimizdiń jańa Salyq kodeksi, «Kedendik retteý týraly» kodeksi, EAEO Kedendik kodeksi týraly kelisimshart, «Jer qoınaýy jáne jer qoınaýyn paıdalaný týraly» kodeks sııaqty ózge de zań jobalaryn eske saldy. Nurlan Nyǵmatýlın konstıtýtsııalyq reformalarmen zańnamalyq qamtamasyz etýge erekshe nazar aýdardy. Onyń sózinshe, «Astana» halyqaralyq qarjy ortalyǵy, Konstıtýtsııalyq keńes qyzmeti, memlekettik nyshandar, sot júıesi máseleleri boıynsha zańnamalardy jetildirý qajet.
Májilis spıkeri eńbek ujymdarynyń saýaldaryna qulaq túrdi. Qoıylǵan suraqtar negizinen agrosektordy damytý, eksporttyq áleýetti arttyrý, óńirlerdi sapaly aýyz sýmen qamtamasyz etý tóńireginde boldy. Osy rette, Nurlan Nyǵmatýlın halyqpen kezdesý depýtattar korpýsy úshin zań shyǵarý qyzmetinde mańyzdy ekenin atap ótti.
- Aqmola oblysy turǵyndary da barlyq qazaqstandyqtar sııaqty Memleket basshysynyń júrgizip otyrǵan saıasatyn qoldaıtynyn,sondaı-aq Qazaqstannyń damý strategııasyn júzege asyrýǵa belsendi atsalysatynyn senimmen aıta alamyn,-dep qorytyndylady Nurlan Nyǵmatýlın.
Eske sala keteıik, Aqmola oblysyna jumys sapary barysynda Májilis tóraǵasy Indýstrııalandyrý kartasy sheńberinde Kókshetaý qalasynda iske qosylǵan «Qazaqstan agroınnovatsııalyq korporatsııasy» jaýapkershiligi shekteýli seriktestigi men óńirdegi irgeli kásiporyn - «Kókshetaý mıneraldy sýlary» aktsıonerlik qoǵamynda bolyp, aýyl sharýashylyǵy tehnıkalaryn qurastyrý men mıneraldy sý shyǵarý úrdistermen tanysty.
Sondaı-aq, «Avıtsenna» emdeý-saýyqtyrý mekemesinde bolyp, turǵyndarǵa sapaly medıtsınalyq kómek kórsetý qyzmetine kóńil boldy.
