Elimizde AI-93 markaly benzınniń baǵasy óspeýi múmkin
Búgin Senatta tilshiler vıtse-mınıstrden shildeden bastap janar-jaǵarmaıdyń keıbir túrlerine qatysty shekti baǵanyń merzimi ótýine baılanysty qandaı sheshim qabyldanǵanyn surady.
«Bul máseleni Energetıka mınıstrligi qadaǵalap otyr. Otyn quny aıtarlyqtaı sharyqtap ketpeıdi dep oılaımyz. Atap aıtqanda, baǵaǵa qatysty eleýli ózgerister bolmas úshin tıisti sharalardy qabyldaımyz», - dedi J. Nurmaǵanbetov.
Sonymen qatar ol suıytylǵan gaz quny birshama qymbattaıtynyn jáne tıisti buıryq jarııalanǵanyn aıtty.
«Budan bólek, AI-93 markaly benzıni boıynsha baǵa óspeıdi dep estidim. Al AI-95 benzınine qatysty mınıstrlik retteý júrgizbeıdi. Bul markadaǵy benzındi kólikterine kóbine aýqatty adamdar quıady», - dedi vıtse-mınıstr.
Jandos Nurmaǵanbetovtiń sózine qaraǵanda, qazirgi kezde barsha álemde munaı men gaz baǵasy aıtyrlyqtaı qymbattaǵan. Degenmen Qazaqstanda azamattardyń otyndy satyp alý múmkindigine qatysty máseleler eskerilip, janar-jaǵarmaı baǵasy boıynsha jaǵdaı baqylaýda tur.
Budan buryn habarlanǵandaı, bıyl qańtar aıynyń basynda Prezıdent Qasym-Jomart Toqaev munaı ónimderiniń baǵasyn memlekettik retteý boıynsha tapsyrma berdi.
Osy oraıda munaı ónimderiniń (benzın, dızel, suıytylǵan gaz) baǵasyna memlekettik retteýdi 180 kúnge engizý, halyq úshin 180 kúnge kommýnaldyq tarıfterdi kóterýge moratorıı engizý qajettigin qarastyrý eskerilgen.
Sonymen qatar Memleket basshysy janar-jaǵarmaı baǵasyna qatysty pikir bildirdi.
«Osy kezeńde Bas prokýratýra Básekelestikti qorǵaý jáne damý agenttigimen, sondaı-aq Energetıka mınıstrligimen birlesip, osy saladaǵy jumystardy retke keltirýge, ony reformalaý úshin keshendi usynystar ázirleýge tıis. Eger bul jumys bir jolǵa qoıylmasa, janar-jaǵarmaı baǵasyn retteý júıesi saqtalady», - dedi Prezıdent.
