Elimizde Ahmet Baıtursynuly atynda bir aýyl, 200 kóshe, 39 mektep bar

NUR-SULTAN. QazAqparat – Qazaqstanda ult ustazy Ahmet Baıtursynuly esimi berilgen bir aýyl, 200 kóshe, 39 mektep, 1 áýejaı jáne 1 mýzeı bar, dep habarlaıdy QazAqparat tilshisi.

«Bizdiń mınıstrlik ult ustazy Ahmet Baıtursynulynyń 150 jyldyq mereıtoıyna oraı 12 tomdyq shyǵarmalar jınaǵyn shyǵaryp, respýblıkalyq, oblystyq, aýdandyq kitaphanalarǵa taratady. Sonymen qatar aǵartýshynyń ómiri men shyǵarmashylyǵy týraly tolyq metrajdy kórkem fılm túsiriledi. Ahmet Baıtursynulynyń esimi respýblıka kóleminde 1 aýylǵa, 200-den astam kóshege, 39 mektepke, 1 áýejaıǵa jáne 1 mýzeıge berilgen. Sondaı-aq, osy aıda Ahmet Baıtursynulynyń murasyn jas mamandarǵa nasıhattap, kitaphananyń mártebesin kóterý maqsatynda kitaphanashylardyń respýblıkalyq tórtinshi sleti ótedi», - dedi QR Mádenıet jáne sport mınıstri Dáýren Abaev elordada Ahmet Baıtursynulynyń 150 jyldyq mereıtoıyna oraı ótken ǵylymı-praktıkalyq halyqaralyq konferentsııada.

Odan bólek, mınıstr málimdegendeı bıylǵy «Altyn dombyra» aqyndar aıtysyna Ahmet Baıtursynuly taqyryby arqaý bolmaq.

«Almatydaǵy Ahmet Baıtursynulynyń mýzeı úıine ǵylymı restavratsııalyq jumys júrip jatyr. Jalpy ult ustazynyń 150 jyldyq mereıtoıy ıÝNESKO kóleminde atalyp ótiledi. Ahmet Baıtursynulynyń artyna qaldyrǵan dúnıesi bizdiń baǵa jetpes asyl muramyz», - deıdi ol.

Búgin Nur-Sultanda Ahmet Baıtursynulynyń 150 jyldyq mereıtoıyna arnalǵan ǵylymı-praktıkalyq halyqaralyq konferentsııa ótti.

Atalǵan shara barysynda Ahmet Baıtursynuly atyndaǵy memlekettik syılyqtyń taǵaıyndalatyny belgili boldy.

Odan bólek, «Úrker» syılyǵyna aǵartýshy atyndaǵy arnaıy nomınatsııa engizilmek.