Elimizde aǵymdaǵy jyly ortasha sút tutyný deńgeıi jan basyna shaqqanda 36 lıtrge jetip otyr - D.Tátiǵulova
ALMATY. 2 qyrkúıek. QazAqparat /Ádilet Musahaev/ - Qazirgi kezde elimizde sút pen suıyq sút ónimderin paıdalaný deńgeıi artyp keledi.
Mysaly, 2011 jyly ortasha sút tutyný deńgeıi jan basyna shaqqanda 36 lıtrge jetip, byltyrǵy jylmen salystyrǵanda 6 paıyzǵa artqan. Bul jóninde «Tetra pak» Ortalyq Azııa kompanııasynyń marketıng jónindegi dırektory Dınara Tátiǵulova Almatyda arnaıy ótken baspasóz máslıhaty kezinde aıtty.
D.Tátiǵulova Qazaqstandaǵy sút naryǵy men suıyq sút ónimderi týraly aqparat bere kele, aldaǵy jyldary ýltrapasterlengen sútti tutyný kólemi 15-17 paıyz artatyndyǵyn jetkizdi. Degenmen, Qazaqstanda oramdaǵy sút ónimderi naryǵyn damytý múmkindikteri zor. «Osy naryqtyń áleýetin paıdalaný úshin Qazaqstannyń óz ishinde óndiriletin súttiń (shıkizat) sapasyn arttyrý qajet. Ol úshin fermerlik sharýa qojalyqtaryn damytý kerek. Bul zamanaýı tehnologııalardyń kómegimen óńdeýge jiberiletin shıkizat kólemin arttyryp, halyqty sapaly da paıdaly ónimmen qamtamasyz etýge múmkindik beredi»,-dep atap ótti ol.
Sonymen qatar D.Tátiǵulova Canadean zertteýlerine súıene otyryp, búginde qazaqstandyq tutynýshylardyń basym bóligi (61%) súttiń oramdaǵysyn satyp alýdy qalaıtyndyǵyn jetkizdi. Al kóshelerde lıtrlep satylatyn súttiń mólsheri 39% quraıdy eken. «Biraq, ol súttiń sapasy baqylaýshy organdar tarapynan tekserilmegendikten túrli ınfektsııa juqtyrý qaýpi de joǵary», -deıdi maman.
Sondaı-aq ol Qazaqstanda et pen astyq ónimderin óndirýge kóńil bólingenimen, sút óndirý isi kenje qalyp jatqandyǵyn aıtady.
Álemniń 170-ten astam elinde qyzmet kórsetetin «Tetra Pak» kompanııasynda 20 myńnan astam adam jumys isteıdi eken.
