Elimizde agrarlyq ǵylymdy qarjylandyrý tártibin ózgertý usynyldy
«Jalpy elimizde agrarlyq ǵylymdy qarjylandyrý tártibin ózgertý kerek. Tájirıbe kórsetip otyrǵandaı, daıyndyq jumystaryna 2 jyldaı ýaqyt kerek. Tarqata aıtqanda, basty ınjenerlik jospardy ázirleýge 3 aı, ony aýyl sharýashylyǵy mınıstrliginde maquldaýǵa 3 aı, qarjylyq-ekonomıkalyq negizdemeni ázirlep, oǵan memlekettik-jekeshelik áriptestik ortalyǵynda bekitýge taǵy 12 aı ýaqyt ketedi. Oǵan qosa bıýdjettik protsedýralar men respýblıkalyq bıýdjetti qabyldaýǵa deıin taǵy 9 aı kerek», - dedi Tóleýtaı Raqymbekov Parlament Májilisinde agrarlyq ǵylymdy, bilim jáne óndiristi ıntegratsııalaý máseleleri boıynsha otyrysta.
Onyń aıtýynsha, basty ınjenerlik jospar ázirlenip, respýblıkalyq bıýdjet bekitilgenshe tehnıka men qurylǵylardyń baǵasy qymbattap ketetinin jetkizdi.
Ulttyq agrarlyq ǵylymı bilim berý ortalyǵynyń basshysy atap ótkendeı, keıingi eki jylda agrarlyq ǵylymdy qarjylandyrý kólemi úsh ese artyp, ártúrli qarajat kózderinen bul baǵytta 17,5 mlrd teńge bólingen. Osylaısha, jalpy ishki ónimniń ǵylymǵa bólinetin úlesi 0,12 paıyzdan 0,35 paıyzǵa artqan. AÓK-ti damytýdyń memlekettik baǵdarlamasyna sáıkes, 2021 jylǵa qaraı bul úles JІÓ-niń 0,5 paıyzyna teńesýi tıis. Al 2030 jylǵa qaraı JІÓ-niń 1 paıyzy ǵylymǵa bólinedi.
