Elimizde aǵashtardy kesýge qatysty talaptar kúsheıtilmek
Senattyń jalpy otyrysynda depýtat Sergeı Ershov Almatydaǵy Sulpak dúkeni mańyndaǵy aǵashtardy kesý jaǵdaıy turǵyndardyń zańdy narazylyǵyna alyp kelgenin atap ótti. Osy oraıda bul baǵytta jaýapkershilikti kúsheıtý qadamdary týraly suraq qoıyldy.
«Tıisti normalar ýaqytyly egizilip otyr jáne olarǵa qoldaý jasaldy. Aǵashty zańsyz kesýge qatysty normalar úsh baǵytta qarastyrylyp otyr. Birinshiden, qaladaǵy aǵashtarǵa toqtalsaq, bul turǵyda aǵashtardy ótemaqylyq tártipte otyrǵyzýǵa baılanysty Indýstrııa jáne ınfraqurylymdyq damý mınıstriniń buıryǵyna ózgeris engiziledi», - dedi Ekologııa, geologııa jáne tabıǵı resýrstar mınıstri Maǵzum Myrzaǵalıev.
«Ekinshiden, aǵashty zańsyz kesýge qatysty shyǵyndy óteýdi retteıtin Úkimet qaýlysy eskerilgen. Eki apta buryn Úkimet otyrysynda qaýlyǵa tıisti ózgerister engizildi. Shyǵynǵa baılanysty zańnama talaptary aıtarlyqtaı kúsheıtildi», - dedi vedomstvo basshysy.
Eske sala ketsek, 23 qarashada túnde Almatyda saýda úıiniń janyndaǵy jaıqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi.
«Qazir aýdan ákimdigi men polıtsııa departamenti kesilgen aǵashtardyń tuqymy men sapasyn anyqtaý úshin oqıǵa ornynda jumys istep jatyr. Aıypty tulǵalar anyqtalǵan soń Polıtsııa Departamenti olardy jaýapkershilikke tartady. Tolyǵyraq aqparatty anyqtaý jumystary aıaqtalǵan soń jarııalaımyz», - dep málim etti qala ákimdigi.
Keıin Almaty qalalyq jasyl ekonomıka basqarmasy saýda úıiniń aldyndaǵy aǵashtardyń jappaı kesilýiniń mán-jaıyn anyqtady.
Prezıdent Qasym-Jomart Toqaev Almaty qalasy Tóle bı kóshesindegi aǵashtardyń otalǵanyna qatysty jaǵdaıǵa nazar aýdardy.
Memleket basshysy Almaty ákimi Baqytjan Saǵyntaevqa atalǵan jaǵdaıǵa baılanysty qyzmettik tekserý júrgizip, kinálilerdi jaýapkershilikke tartýdy tapsyrdy.
24 qarasha kúni qala ákimi Baqytjan Saǵyntaev máseleni óz baqylaýyna alǵanyn málim etti.
Búginde Almaty prokýratýrasy zańsyz aǵash kesý faktisi boıynsha tergeý júrgizip jatyr.
