Elimizde ádep buzý kórsetkishi tómendegen
QOSTANAI. QazAqparat - Qostanaıda Memlekettik qyzmet isteri jáne sybaılas jemqorlyqqa qarsy is-qımyl agenttiginiń uıymdastyrýymen «Memlekettik qyzmettegi minez-qulyq ádep standarttary: tájirıbe jáne jetistikter» atty respýblıkalyq forým ótti, dep habarlaıdy QazAqparat.
Memlekettik qyzmetshilerdiń jumys sapasy, olardyń tájirıbeleri men jetistikterin talqylaýǵa arnalǵan jıyndy arnaıy monıtorıngtik top jetekshisi, qoǵam qaıratkeri Aıgúl Soloveva júrgizip otyrdy.
Aldymen, Qostanaı oblysy ákiminiń orynbasary Sergeı Karplıýk baıandama jasady. Ol óz sózinde oblystyń bıylǵy jetken jetistikterin ortaǵa saldy. Sonymen qatar, memlekettik qyzmet pen azamattyq qoǵamnyń róline toqtaldy.
«Osyndaı aýqymdy etıkalyq pikirtalastyń bizdiń oblysta ótkeninin qýanyshtymyz. Bul bizdiń memlekettik qyzmetshilerge úlken tájirıbe. Óńirdegi memlekettik organdar azamattyq qoǵam uıymdarymen tyǵyz baılanysta. Qazirdiń ózinde jergilikti atqarýshy organdarla 3,5 myń memlekettik qyzmetshi jumys isteıdi. Jemqorlyqpen kúres belsendi túrde júrgizilýde. Osy jyldyń 9 aıy ishinde etıkalyq tártip buzýshylyq deńgeıi tómendedi.
Qaramaǵyndaǵy qyzmetkerler sybaılas jemqorlyqqa jol bergende birinshi basshylardyń jeke tártiptik jaýapkershiligin kúsheıtý máselesi pysyqtalýda», - dedi Sergeı Karplıýk.
QR Memlekettik qyzmet isteri jáne sybaılas jemqorlyqqa qarsy is-qımyl agenttigi apparat jetekshisi Saıan Ahmetjanov Ádep jónindegi keńestiń jumysy týraly málimet berdi.
«Ótken 9 aıda Ádep jónindegi keńes 117 otyrys ótkizdi. Ol jıyndarda 529 suraq talqylandy. Etıkalyq tártip buzǵan 271 laýazymdy tulǵa jazalandy. 2015 jyldan bastap esepke alsaq, etıkalyq tártipbuzýshylyqtyń azaıǵanyn baıqaýǵa bolady. Sol jyly 338 tulǵa tártip buzsa, bıyl onyń sany 182-ge qysqardy. Al byltyrǵy jyl biz úshin erekshe. Tanymal «Transparency International» reıtıngi boıynsha bizdiń elimizde jemqorlyq ahýaly tómendedi. Qazaqstan óz tarıhynda birinshi ret 31 upaıǵa ıe boldy», - dedi Saıan Ahmetjanov.
Saıan Ahmetjanov bıylǵy jyldyń qańtarynan bastap memlekettik ortalyq jáne jergilikti organdarda jańa eńbekaqy júıesi pılottyq joba retinde engizilgenin aıtty.
Forýmda BUU Damý baǵdarlamasy Tıimdi basqarý departamentiniń dırektory Konstantın Sokýlskıı, Qazaqstan Prezıdenti janyndaǵy Memlekettik basqarý akademııasynyń vıtse-rektory Altaır Ahmetovter baıandama oqydy.
Sondaı-aq, Qazaqstannyń memleket jáne qoǵam qaıratkeri Murat Ábenov forýmda sóz sóılep, usynystaryn ortaǵa salǵan bolatyn.
