Elimizde 8 myńnan astam naýqas lımfa júıesindegi qaterli isik dertimen esepke alynǵan
Lımfoma – aǵzanyń lımfa júıesindegi qaterli isik túri. Bul jaǵdaıda onkologııa lımfa tininiń jasýshalarynda damıdy, al qaterli isik protsesiniń taralýy qan aǵymymen de, metastazdarmen de júredi. Lımfoma ekige bólinedi: hodjkın lımfomasy jáne hodjkın emes lımfoma.
Qazaq onkologııa jáne radıologııa ǵylymı-zertteý ınstıtýtynyń málimetinshe, 2021 jyly Qazaqstanda 922 adamǵa lımfoma dıagnozy qoıyldy. Dıspanserlik esepte 8 myńnan astam naýqas tur. Olardyń shamamen 70%-y – hodjkın emes lımfomaǵa, qalǵany hodjkın lımfomasyna shaldyqqan.
«Lımfomanyń negizgi belgileriniń biri - lımfa túıinderiniń ulǵaıýy, sonymen qatar kókbaýyrdyń ulǵaıýy. Denede basqa isik tárizdi túzilimder paıda bolýy múmkin. Jalpy belgileri bar, mysaly: dene temperatýrasynyń 37,50 S joǵary kóterilýi, bas aýrýy, tersheńdik, jótel, entigý, dene salmaǵynyń tómendeýi, tábettiń joǵalýy», - dep atap ótti QazORǴZI baspasóz qyzmeti.
Lımfomany emdeýde ýaqtyly jáne durys dıfferentsıaldy dıagnostıka óte mańyzdy ról atqarady.
«Qazirgi ýaqytta lımfoma emdelmeıtin aýrýlar sanatynan eń sátti emdeletin aýrýlardyń qataryna ótti. Serpilis dıagnostıkanyń dáldigin arttyrý, terapııanyń zamanaýı shemalaryn ázirleý, sondaı-aq jańa dárilik zattardyń (monoklonaldy antıdeneler, ımmýndyq jaýaptyń baqylaý núkteleriniń ıngıbıtorlary), ilespe terapııanyń jáne aspaptyq dıagnostıkanyń paıda bolýy arqasynda júzege asyryldy», - dep habarlady Qazaq onkologııa jáne radıologııa ǵylymı-zertteý ınstıtýtynan.
Dárigerlerdiń aıtýynsha, emdeý tásili aýrýdyń satysyna jáne belgilerine baılanysty bolady.
«Belgili bir naýqasqa arnalǵan emdeý jospary onyń jasyna jáne jalpy densaýlyǵyna baılanysty. Emdeý mamandandyrylǵan hımıoterapııalyq/gematologııalyq bólimshede júrgiziledi. Dáriger usynǵan terapııa josparyn patsıent talqylaýdan keıin, jaqyn adamdarymen keńeskennen keıin qabyldaıdy. Ádette, isikke qarsy dári-dármekter, sáýlelik terapııa jáne osy ádisterdiń kombınatsııasy qoldanylady, hırýrgııalyq emdeý sırek kezdesedi. Sonymen qatar, janama emdeý taǵaıyndalady, onyń maqsaty isikke qarsy terapııanyń janama áserleri men asqynýlaryn azaıtý», - delingen habarlamada.