Elimizde 8 aıda 7,7 mln sharshy metr turǵyn úı paıdalanýǵa berildi
ASTANA. QazAqparat - 8 aıdyń qorytyndysy boıynsha 7,7 mln sharshy metr turǵyn úı paıdalanýǵa berildi. Bul týraly Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.
«Turǵyn úı qurylysy boıynsha ınvestıtsııalar 701,6 mlrd teńgeni qurady. Ol ótken jylǵy deńgeıden 31,2 paıyzǵa joǵary. 8 aıdyń qorytyndysy boıynsha 7,7 mln sharshy metr turǵyn úı paıdalanýǵa berildi. Bul 2017 jyldyń sáıkes kezeńimen salystyrǵanda - 111,8 paıyz. Turǵyn úılerdi paıdalanýǵa berý jyldyq josparynyń 64 paıyzy oryndaldy», - dedi mınıstr.
Jalpy, onyń dereginshe, respýblıka boıynsha shamamen 67 myń baspana paıdalanýǵa berildi. Onyń ishinde 26 665 jeke úı bar. Turǵyn úılerdi tapsyrý kóleminiń ulǵaıýy ótken jylmen salystyrǵanda respýblıkanyń 14 óńirinde saqtalýda.
«Aldyńǵy qatarda Almaty oblysy, Shymkent qalasy, Túrkistan, Mańǵystaý, Atyraý, Qostanaı jáne Aqtóbe oblystary tur. Respýblıkanyń 3 óńirinde turǵyn úılerdi tapsyrý kólemi tómendegen. Atap aıtqanda, Qyzylorda oblysynda 19 jáne Pavlodar oblysynda 13, Astana qalasynda 8,7 paıyzǵa tómen. Jyldyq 108 paıyzdyq josparǵa sáıkes respýblıkanyń 2 óńirinde ósim baıaý. Olar: Qaraǵandy jáne Shyǵys Qazaqstan oblystary», - dedi Jeńis Qasymbek.
