Elimizde 8 aıda 115 transplanttaý jasaldy - DSM
ASTANA. 12 qyrkúıek. QazAqparat - Qazaqstanda transplanttaý belsendi damýda. Tek 2013 jyldyń 8 aıynda elimiz boıynsha 115 transplanttaý jasaldy. Bul týraly búgin Parlament Májilisinde «Halyq densaýlyǵy jáne densaýlyq saqtaý júıesi týraly» Kodekske engiziletin ózgerister men tolyqtyrýlar boıynsha baıandaǵan Densaýlyq saqtaý mınıstrliginiń Jaýapty hatshysy Serikbol Mýsınov málim etti.
Jaýapty hatshynyń aıtýynsha, transplanttaýdy odan ári damytý maqsatynda donorlardyń, retsıpıentterdiń, transplanttaý boıynsha qyzmetter usynatyn medıtsına uıymdarynyń quqyqtary men múddelerin qorǵaıtyn zańnamalyq bazany jetildirý usynylady. «Aıtalyq, tiri donordan tinderdi jáne aǵzalardy alý notarıatpen kýálandyrǵan jazbasha kelisimimen ǵana júzege asyrylýy múmkindigine qatysty naqtylandyrý engizilýde. Budan bólek, zań jobasymen Gemopoezdik diń jasýshalary donorlarynyń ulttyq tirkelimin qurý jáne onyń sheteldik uqsas tirkelimdermen ózara is-qımyly bekitilip jatyr», - deıdi S. Mýsınov.
Onyń sózine qaraǵanda, zań jobasynda donorlardyń quqyqtaryn qorǵaý boıynsha da birqatar normalar qamtylady. Atap aıtqanda, donorlarǵa ortasha aılyq jalaqysyn saqtaı otyryp, qosymsha demalys kúnin alý sharalary da qarastyrylady. Turǵylyqty jerin anyqtaý múmkin bolmaǵan, jaqyn týystarynyń nemese zańdy ókilderiniń kelisiminsiz, medıtsınalyq qujattamaǵa jazbalardy resimdep jáne ol týraly keıinnen bir táýlik ishinde densaýlyq saqtaý uıymdarynyń laýazymdy adamdaryn habardar ete otyryp dárigerler konsılıýmynyń sheshimi boıynsha shuǵyl transplanttaý kórsetilgen.
