Elimizde 71 temirjol vokzaly qaıta jóndeledi
ASTANA. QazAqparat - Qazaqstanda 71 temirjol vokzaly qaıta qalpyna keltiriledi. Bul týraly QR Investıtsııalar jáne damý mınıstri Jeńis Qasymbek málim etti. dep habarlaıdy QazAqparat IDM saıtyna silteme jasap.
Mınıstrdiń aıtýynsha, qoldanystaǵy Temirjol salasynda jolaýshylarǵa qyzmet kórsetýdiń ulttyq standarttary jáne Jolaýshylardy temirjol kóligimen tasymaldaý qaǵıdalaryna sáıkes múmkindigi shekteýli adamdar úshin tıisti jaǵdaılar jasalýda.
«Búgingi kúni, 136 vokzal tolyqtaı tolyq Ulttyq standart talaptaryna (qoldanystaǵy 302 vokzaldan) sáıkestendirildi. 47 vokzal tıisti tehnıkamen jabdyqtaldy. Aldaǵy besjyldyqta «Qazaqstan temir joly» kompanııasy kúrdeli jóndeý jumystary josparynyń aıasynda 71 temirjol vokzalyn salady nemese qaıta qalpyna keltiredi, sondaı-aq 263 vokzaldaǵy jolaýshylar platformalaryn jóndeıdi», - dep atap ótti Jeńis Qasymbek.
Sondaı-aq, temirjoldyń túrli baǵyttary boıynsha 22 baǵdardyń quramynda júrip-turýy shekteýli adamdarǵa arnalǵan 33 arnaıy kýpe vagondary bar. «Tulpar-Talgo» poıyzdarynda arnaıy oryndarǵa arnalǵan 70% kóleminde jeńildik belgilengen.
Budan bólek, mınıstrlik avtomobıl kóligi salasynda normatıvtik quqyqtyq bazany jetildirý sharalaryn qabyldaýda. Atap aıtqanda, zańnamalyq deńgeıde múmkindigi shekteýli tulǵalar úshin qoljetimdilik pen qolaılylyqty qamtamasyz etýge baǵyttalǵan avtovokzaldar men avtostantsııalarǵa qoıylatyn mindetti talaptar kózdelgen.
«Búgingi kúni elde 36 avtovokzal jáne 110 avtostansa jumys isteıdi. Olardyń 78%-y Ulttyq standartqa sáıkes keledi. Sondaı-aq, «Avtomobıl kóligi týraly» zańda jalpy paıdalanymdaǵy kólikti múgedek jolaýshylardyń otyryp-túsýine arnalǵan qurylǵylarmen jabdyqtaý týraly talaby belgilengen Avtobýstar jańarǵan saıyn qoǵamdyq kólikte júrip turýy shekteýli tulǵalarǵa qolaıly bolady», -dedi mınıstr.
Sonymen qatar, múmkindigi shekteýli tulǵalarǵa kóliktik qyzmetterdi kórsetý úshin respýblıkanyń 20 qalasynda arnaıy taksı qyzmeti jumys isteıdi. Barlyq arnaıy taksı qyzmetteriniń avtoparkinde183 mashına bar.
Mınıstrlik áýe kóligi salasyna jeke paıdalanýǵa arnalǵan zembil men múgedek arba-kreslo retinde áýe kóliginde tegin tasymaldaýǵa jatatyn jolaýshylardy, júkterdi tasymaldaý Erejesine ózgerister engizdi. Múgedekterge jaıly jaǵdaı jasaýdy qamtamasyz etý úshin jolaýshylar termınalyn jobalaý jáne qurylysyn júrgizý barysynda jeńil ári ońaı ótý úshin pandýstar men ózge de konstrýktsııalar qarastyrylǵan.
Sondaı-aq, mınıstrlik ushý kezinde jaýapkershilik týraly deklaratsııaǵa qol qoıý jónindegi áýe kompanııalardyń talaptaryn alyp tastady.
