Elimizde 7 myńǵa jýyq jetim balalar JOO men kolledjerde bilim alýǵa múmkindik aldy
ALMATY. QazAqparat - Búgin Almatyda «Bóbek» qorynyń prezıdenti Sara Alpysqyzy men QR Bilim jáne ǵylym mınıstri Aslan Sárinjipov Memlekettik bilim berý jınaqtaýshy júıesi aıasynda balalar úıleriniń tárbıelenýshilerine qaıyrymdylyq kómek kórsetý jóninde ózara Kelisimge qol qoıady.
Búgingi kún «Bóbek» qorynyń qamqorlyǵy arqasynda elimizdegi 145 balalar úıiniń árbir balasy úshin sheshýshi kún boldy. Olar endi súıikti mamandyqtary boıynsha jaqsy bilim alýǵa múmkindik alyp otyr.
Atalmysh Qor tárbıelenýshilerge memlekettik bilim berý jınaqtaýshy júıesi boıynsha joǵary oqý oryndarynda oqý aqysyn tóleýge aqsha jınaýǵa bir ret jáne tegin qarjy bóledi. Qor qurǵan bastapqy kapıtalǵa, jyl saıyn 7-10 paıyz kóleminde syıaqy jáne 7 paıyz mólsherinde memleketten syıaqy túsip otyrady.
«Biz úshin balalarymyzdyń eresek ómirge barynsha beıimdelgendigi óte mańyzdy. Biz olarǵa jaqsy bilim alyp, jumysqa turyp ketýlerine kómekteskimiz keledi. Eń bastysy, bul balalar meıirimdilikke, jaqsylyqqa degen senimderin joǵaltpaýlary tıis. Olar qashanda memlekettiń qamqorlyǵynda bolady. «Bóbek» qory 20 jyl ishinde 5 mlrd. teńge jınady. Bul qarjylar bankterde jınaqtalǵan. Sondyqtan men balalar úıleriniń túlekterine jaqsy bilim alýlaryna kómektesýdi uıǵardym», - dedi óz sózinde Sara Alpysqyzy.
Óz kezeginde QR Bilim jáne ǵylym mınıstri Aslan Sárinjipov: «Bul jobany júzege asyrý arqasynda, balalar úıleriniń túlekterine joǵary deńgeıde kásibı bilim alýlaryna jaǵdaı jasalady. Biz óz kezegimizde olardyń kásibi turǵyda ósý joldaryn qadaǵalaıtyn naqty júıe jasaımyz», - dedi.
Kelisimniń qatysýshylary quramyna «Memlekettik bilim berý jınaqtaýshy júıesiniń» operatory «Qarjy ortalyǵy» AQ men «Qazaqstan Halyq banki» AQ endi.
«Qarjy ortalyǵy» AQ prezıdenti Ramazan Álimqulovtyń aıtýynsha, árbir balanyń atyna jeke shot ashylyp ta qoıylǵan. Ondaǵy qarjy 23 jasqa deıin jınaqtalady. Qarjy tek joǵary jáne kásibı tehnıkalyq bilim alýǵa ǵana jumsalady.
«Joǵary oqý ornyna túsetinderge 3-3,5 mln. teńge jınalady. Al kásibı-tehnıkalyq bilim alǵysy keletindlerge odan azdaý túsedi. Bul somalar balalardyń jınaqtalý kezindegi jasyna baılanysty. Mysaly, bireýler kelesi jyly bitiredi. Basqalarǵa oqýǵa túsýge áli 10 jyl bar degendeı», - dedi Ramazan Álimqulov.
Odan basqa, eger salymshylar, ıaǵnı balalar úıiniń túlekteri joǵary oqý ornyna grant boıynsha túsetin bolsa, onda jınaqtalǵan qarjyny banktiń syıaqysy jáne memlekettiń syılyq aqysymen qosyp ala alady.
«Taǵy bir aıta ketetin jaıt, biz memlekettiń syılyqaqasyn ınflıatsııa deńeıinen tómen qoımaý týraly Úkimetke aqparat berip otyratyn bolamyz», - dedi R. Álimqulov.
