Elimizde 7 mln tonna dándi-daqyldar bastyryldy

NUR-SULTAN. QazAqparat – 1 qyrkúıektegi jaǵdaı boıynshaBatys Qazaqstan jáne Túrkistan oblystarynda dándi jáne dándi-burshaqty daqyldardy jınaý aıaqtalýǵa jaqyn. Bul týraly QazAqparat AShM baspasóz qyzmetine silteme jasap habarlaıdy.

Tamyz aıynyń sońynda Jambyl oblysynda egin jınaý jumystary aıaqtaldy. Bıyl Áýlıeata óńirinde 359,3 myń ga jerge dándi jáne burshaqty daqyldar egildi. Aımaq dıqandary 816,6 myń tonna bastyrdy, bul ótken jylmen salystyrǵanda 136 myń tonnaǵa artyq. Bul jetistikke jambyldyqtar egis alqabyn 26 myń gektarǵa keńeıtý jáne gektarynan 22,7 tsentrge deıin shyǵymdyqtylyqtyń ulǵaıýyna baılanysty jetip otyr.

Batys Qazaqstan jáne Túrkistan oblystarynda alqaptardyń 95%-dan astamy jınaldy. Ótken jyly osy kúni osy óńirlerde egistiktiń 75%-na jýyǵy jınalǵan edi.

Qazirgi ýaqytta BQO-da ortasha ónimdilik gektaryna 11,3 ts, Túrkistan oblysynda gektaryna 23,8 ts deńgeıinde.

Almaty oblysynda egis alqaptarynyń jartysynan kóbi jınaldy. Basqa óńirlerde – Aqmola, Aqtóbe, Shyǵys Qazaqstan, Qaraǵandy, Qostanaı, Qyzylorda, Pavlodar jáne Soltústik Qazaqstan oblystarynda búginde egin alqaptarynyń 23-43% jınaldy.

Jalpy respýblıka boıynsha 1 qyrkúıekke 5,8 mln gektardan astam dándi jáne burshaqty daqyldar jınaldy. Bul barlyq jınaý alańynyń 37,3% quraıdy. Ortasha ónimdilik 12,2 ts/ga quraıdy.